Prezidentimizdiń 2025-jıl 5-mart kúni «Kóshpes múlkti ǵalaba bahalaw sistemasın engiziw haqqında»ǵı pármanı qabıl etildi. Oǵan bola, Ózbekstanda kóshpes múlkti bazar bahasına jaqın bahalaw sisteması jolǵa qoyıladı hám bul process 2025-jıldan baslap basqıshpa-basqısh ámelge asırıladı.

Jańa sistema sheńberinde elimizdegi 8 millionnan aslam turaq jay hám turaq jay emes imaratlar, 7 millionǵa shamalas jer uchastkaları ekonomikalıq aktiv sıpatında bahalanadı. Sonday-aq, kóshpes múlkti alıp-satıw, girewge qoyıw, jámiyettiń zárúrlikleri ushın alıp qoyıw hám salıq salıw sıyaqlı processlerde onıń haqıyqıy bahasın belgilew sisteması engiziledi.
Pármanǵa bola, 2025-jıl 1-dekabrge shekem Tashkent qalasında eksperiment tárizinde bahalaw sisteması sınaqtan ótkeriledi. Onnan soń mal-múlk hám jer salıǵı boyınsha salıq bazasın qayta belgilew jáne salıq stavkaların tómenletiw boyınsha usınıslar Ministrler Kabinetine kirgiziledi.
2025-2026-jıllarda Tashkent qalasında eksperiment tárizinde, 2026-2027-jıllarda Nókis hám wálayatlar oraylarında, 2027-jıldan baslap qalǵan aymaqlarda bahalaw jumısları basqıshpa-basqısh ámelge asırıladı.
Usı sistemanıń ámelge asırılıwına Еkonomika hám qarjı ministrligi juwapker etip belgilendi. Sonday-aq, Kadastr agentligi janında Kóshpes múlkti ǵalaba bahalaw milliy orayı shólkemlestiriledi.
Ministrlik málimleme xızmetiniń xabar beriwinshe, jańa sistema bazarǵa tiykarlanǵan bahalaw mexanizmin engizip, múlk salıǵı stavkaların qayta kórip shıǵıw hám salıq júgin ádillikli bólistiriwde úlken áhmiyetke iye.

N.Ziyodullaeva, ÓzA