Nókis qalasında Qaraqalpaqstan Respublikasındaǵı ministrlik, uyım hám shólkemlerdiń basshıları hám aymaqlardaǵı studiyalardan rayon hákimleri, tiyisli juwapkerlerdiń qatnasıwında ótkerilgen májiliste 2025-jılǵı Nawrız ulıwmaxalıqlıq bayramına tayarlıq kóriw máselesi dodalandı.

Atap ótilgenindey, shıǵıs jańa jılı – Nawrız bayramı ásirler dawamında miyrim-shápáát, miynet hám dóretiwshilik nıshanı sıpatında xalqımız turmısında teńsiz orın iyelep kelmekte. Prezidentimizdiń «2025-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında»ǵı qararında bıyıl bul bayram mámleketimizde «Qádiriyatlarıń máńgi bolsın, Nawrız!» degen bas ideya tiykarında keńnen belgilenetuǵını belgilep qoyıldı.
Ministrler Keńesinde ótkerilgen májiliste jaqınlasıp kiyatırǵan Nawrız ulıwmaxalıqlıq bayramına puxta tayarlıq kóriw maqsetinde Respublikalıq jumısshı topar qáliplestirilgeni, olar qala hám rayon orayları, awıllıq elatlı punktlerinde abadanlastırıw hám kóklemzarlastırıw, sonday-aq, jańa sistema tiykarında xalıqtıń qıytaq jerlerinen nátiyjeli paydalanıwı baǵdarında ámelge asırılıp atırǵan jumıslardı úyreniwi hám járdem beriwi atap ótildi.
«Kámbaǵallıqtan abadanlıqqa qaray» baǵdarlaması sheńberinde xalıqtıń qıytaq jer maydanların suw menen támiyinlew maqsetinde ámelge asırılıp atırǵan jumıslar boyınsha aymaqlardaǵı juwapkerlerdiń málimlemeleri tıńlandı hám bul baǵdardaǵı jumıslardı jedellestiriw zárúr ekenligi atap ótildi. Báhárgi abadanlastırıw hám «Jasıl mákan» ulıwma milliy joybarı, kanallar, ishki salmalardı betonlaw hám jámiyetlik orınlardı tazalaw boyınsha shembilikler shólkemlestiriw sıyaqlı máseleler de dodalanıp, ámelge asırılatuǵın ilajlar belgilep alındı.

Qaraqalpaqstan xabar agentligi