Qaraózek rayonında «8-mart-xalıqaralıq hayal-qızlar kúni» múnásibeti menen «Hayalǵa itibar» súreni astında bayram keshesi bolıp ótti.

Ilajǵa nuranıy analar menen hár qıylı tarawlarda jemisli miynet islep atırǵan belsendi hayal-qızlar qatnastı.
Onda rayon hákimi Anvar Baymuratov hám bir qatar nuranıylar shıǵıp sóylep, ilaj qatnasıwshıların hayal-qızların bayram menen qutlıqlap, shańaraqlarına amanlıq, awızbirshilik, jumıslarında tabıslar tiledi.
Sonday-aq, bayram ilajında shıǵıp sóylewshiler tárepinen elimizde óziniń bay tájiriybesi menen mámleketimizde alıp barılıp atırǵan reformalarda belsene qatnasıp jańa Ózbekstandı qurıw, xalqımız abadanlıǵın arttırıw, jaslardı kámil insanlar etip tárbiyalaw jolında miynet etip kiyatırǵan nuranıy hayal-qızlar hám belsendi jaslarımızdı maqtanısh penen tilge aldı.
Sonıń menen birge, rayondaǵı bir qatar nuranıy analarımızǵa, belsendi hayal-qızlar menen bilimli jaslarımızǵa bayram dásturxanı jayılıp, húrmet-izzet kórsetildi hám rayon hákimliginiń Húrmet jarlıqları menen estelik sawǵalar tapsırıldı.
-Elimiz basshıları tárepinen hayal-qızlarǵa kórsetilip atırǵan bunday joqarı itibar hám húrmet ushın eń áweli, húrmetli Prezidentimizge úlken minnetdarshılıq bildiremen. Aldaǵı waqıtları bizge bildirilgen isenimdi tolıq aqlap, mámleketimizdiń ele de gúllep-rawajlanıwına ózimizdiń úlesimizdi qosa beremiz,-deydi Ózbekstan xalıq demokratiyalıq partiyası Qaraózek rayonlıq Keńesiniń baslıǵı Rayxan Qarmısova.
Bayram ilajı yoshlı koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı.