Еkologiya, qorshaǵan ortalıqtı qorǵaw hám klimat ózgeriwi ministri Aziz Abduhakimov Jáhán bankiniń qorshaǵan ortalıqtı qorǵaw, tábiyǵıy apatlar qáwpin basqarıw, jer resursların turaqlı rawajlandırıw boyınsha global direktorı Sameh Vahba menen ushırastı.

Ushırasıwda tárepler irrigaciya, landshaftlardı tiklew hám hawanıń pataslanıwın qadaǵalaw tarawlarına investiciya kirgiziw baǵdarında eki tárepleme birge islesiwdi bekkemlew máselesin dodaladı. Sonday-aq, Oraylıq Aziyada jer degradaciyası, shólleniw hám klimat ózgeriwine qarsı gúreske qaratılǵan RESILAND joybarına da ayrıqsha itibar qaratıldı. Bul joybar Jáhán bankiniń region ekosistemaların turaqlı rawajlandırıw hám qorǵaw strategiyası sheńberinde ámelge asırılmaqta.
S.Vahba ministrge Jáhán bankiniń «Tashkent qalasında hawanıń sapasın bahalaw» hám ministrlik qánigeleri menen birgelikte islep shıǵılǵan «Ózbekstanda hawanıń sapasın basqarıwdı jetilistiriw boyınsha jol kartası» esabatların berdi. Jáhán banki sonday-aq, hawanıń sapasın monitoring etiw hám jaqsılaw baǵdarında birge islesiwdi kúsheytiwdi usınıs etti.
Ushırasıw sońında tárepler buzılǵan landshaftlardı tiklew, ekoturizmdi rawajlandırıw hám jergilikli jámiyetshilikti qollap-quwatlawǵa qaratılǵan birgeliktegi joybarlar tabıslı ámelge asırılatuǵınına úmit bildirdi. Atmosfera hawası monitoringi hám qorshaǵan ortalıqtı qorǵaw tarawında birge islesiwdi jáne de rawajlandırıw boyınsha kelisimge erisildi.

Muhayyo Toshqoraeva,
ÓzA