Ózbekstan Respublikası Prezidenti basshılıǵında usı jıldıń 16-yanvar kúni elimizge investiciyalardı keńnen tartıw hám eksporttı arttırıw baǵdarındaǵı jumıslardıń nátiyjeliligi hám aldaǵı tiykarǵı wazıypalar boyınsha ótkerilgen videoselektor májilisinde taraw basshılarına bir qatar wazıypalar hám tapsırmalardı belgilep bergen edi.

Prezidentimiz tárepinen videoselektor májilisinde berilgen tapsırmalardıń orınlanıwın támiyinlew maqsetinde, Ózbekstan mámleketlik denetárbiyası hám sport universiteti Nókis filialı direktorı, professor Bayrambay Erimbetov Túrkiyanıń Bursa qalasındaǵı Ózbekstannıń húrmetli konsulı, isbilermen hám investor Ali Baklan hám Ózbekstan mámleketlik denetárbiyası hám sport universitetiniń xalıqaralıq baylanıslar boyınsha prorektorı Jasur Zaripbaev penen ushırastı.
Onda filial direktorı dáslep Prezidentimizdiń ayrıqsha itibarı menen barlıq tarawlar qatarında elimizde sport tarawın hám joqarı bilimlendiriw sistemasın rawajlandırıw baǵdarında ámelge asırılıp atırǵan jumıslar, professor-oqıtıwshılar menen studentler ushın jaratılıp atırǵan qolaylı sharayatlar haqqında keń túrde maǵlıwmatlar berip ótti.
Soń eki tárep filialdı rawajlandırıw baǵdarında belgilep alınǵan aldaǵı rejedegi bir qatar joybarlarǵa Túrkiya Respublikasınıń investorların tartıw boyınsha sóylesiwler alıp bardı.
Sonday-aq, sportshılarımızdıń keleshekte joqarı nátiyjelerge erisiwi ushın bunnan bılay da keń imkaniyatlar jaratıw máseleleri dodalandı.

Adilbay Orazov,
Qaraqalpaqstan xabar agentligi sholıwshısı.