Nókis qalasında mámleketlik uyımlar hám shólkemlerge jumısqa qabıl etiwdiń ashıq hám zamanagóy sisteması, sonday-aq, bul tarawda 2024-jılı ámelge asırılǵan jumıslardıń nátiyjesi boyınsha Ózbekstan Respublikası Prezident janındaǵı Mámleketlik xızmetti rawajlandırıw agentliginiń juwapker wákilleriniń qatnasıwında baspasóz ánjumanı shólkemlestirildi.

Ánjumandı Ózbekstan Respublikası Prezidenti janındaǵı Mámleketlik xızmetti rawajlandırıw agentliginiń Málimleme xızmeti baslıǵı Sevara Zakirova alıp bardı.
Onda Ózbekstan Respublikası Prezidenti janındaǵı Mámleketlik xızmetti rawajlandırıw agentliginiń Qaraqalpaqstan Respublikası filialı baslıǵı Adilbek Reimbaev, orınbasarı Kamarbek Seitniyazovlar 2024-jıl dawamında filial tárepinen ámelge asırılǵan jumıslar boyınsha ánjuman qatnasıwshılarına keń túrde maǵlıwmatlar berdi.
Ilajda Ózbekstan Respublikası Prezidentiniń 2019-jıl 3- oktyabrdegi PQ-4472-sanlı Qararında mámleketlik uyımlar hám shólkemlerdiń kadrlar bólimsheleriniń respublikada kadrlar siyasatı hám mámleketlik puqaralıq xızmetiniń zamanagóy principlerin engiziwde eń áhmiyetli buwın ekenligi atap ótildi.
Atap aytqanda, 2024-jıl dawamında respublikadaǵı 37 ministrlik hám basqarmalar, 17 rayon (qala) hákimlikleri tárepinen, Mámleketlik xızmetti rawajlandırıw agentliginiń «vacancy. argos.uz» portalında járiyalanǵan 1670 vakant lawazımları ushın tańlawlarǵa 66 mıńǵa shamalas talabanlardan hújjet kelip túsken.
-Tańlaw juwmaǵına jetken 1622 vakant lawazımlarınıń 988 qánigeli xızmetkerler menen tolıqtırıldı, 634 vakant lawazımlarǵa bolsa, qayta tańlaw járiyalandı,-deydi Ózbekstan Respublikası Prezidenti janındaǵı Mámleketlik xızmetti rawajlandırıw agentliginiń Qaraqalpaqstan Respublikası filialı baslıǵınıń orınbasarı Kamarbek Seitniyazov.-Sonday-aq, Qaraqalpaqstan Respublikasında Milliy kadrlar rezervine kirgiziw ushın 69 talabannıń dizimi qáliplestirildi hám 19ı Mobil rezerv ushın tańlap alındı. Olardan 5 talabanlar joqarı lawazımlarǵa tayınlandı.
Baspasóz ánjumanında jurnalistler tárepinen agentliktiń juwapker wákillerine bir qatar sorawlar berilip, olarǵa tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı.