Nókis qalasında “8-mart – Xalıqaralıq hayal-qızlar kúni» bayramı múnásibeti menen huqıq qorǵaw uyımlarında xızmet etip atırǵan oficer hám serjant hayal-qızlardıń qatnasıwında “Tumaris izbasarları” atamasında sport jarısları ótkerildi.
Xalıqaralıq sport standartlarına muwapıq ótkerilgen jarısta qatnasıwshılar 200, 400 hám 800 metr aralıqlarǵa juwırıw, AK-74 hám PM quralların tez waqıt ishinde tolıq bolmaǵan bóleklerge ajıratıw-jıynaw hám estafetalıq juwırıw túrleri boyınsha bellesti.
Qızǵın ótken jarıs juwmaǵına bola, Qaraqalpaqstan Respublikası Ishki isler ministrligi komandası birinshi, Bajıxana basqarması komandası ekinshi hám Milliy gvardiya Qorǵaw basqarması komandası úshinshi orınlardı iyeledi.
– Bajıxanashı hayal-qızlar arasında 800 metrge juwırıw boyınsha N.Alawatdinova 3-orın, AK-74 hám PM quralların tez waqıt ishinde tolıq bolmaǵan bóleklerge ajıratıw-jıynaw boyınsha A.Turdımuratova 1-orın, estafetalıq juwırıw túri boyınsha 2-orın hám juwmaqlawshı esapta bajıxanashı hayal-qızlar xızmetkerleri sıylı 2-orındı iyelewge miyasar boldı,-dedi basqarmanıń málimleme xızmeti bas inspektorı Yu.Kudiyarova.
Sonday-aq, Qaraqalpaqstan Respublikası Bajıxana basqarmasında da “8-mart – Xalıqaralıq hayal-qızlar kúni” múnásibeti menen sport túrleri boyınsha jarıslar shólkemlestirildi.
Basqarmanıń attestatlanǵan hám erkin jallanǵan hayal-qız xızmetkerleri arasında voleybol, qısqa aralıqlarǵa juwırıw, shaxmat, shashka, darts hám PM oq atar quralın tolıq emes bóleklerge ajıratıw hám jıynaw boyınsha bolıp ótken sport jarısları da qızǵın bellesiwlerge bay boldı.
Hayal-qızlar arasında salamat turmıs tárizin úgit-násiyatlaw, komandalıq oyınlar arqalı awızbirshilikti arttırıw hám bayram keypiyatın beriw maqsetinde ótkerilgen jarıslarda jeńimpazlar anıqlanıp, sıylıqlandı.

Qaraqalpaqstan xabar agentligi.