Házirgi waqıtta Oliy Majlis Nızamshılıq palatasınıń gezektegi májilisi bolıp ótpekte. Májilis kún tártibinen mámleketimizdiń jámiyetlik -siyasiy turmısına baylanıslı bir qatar nızam joybarların dodalaw orın alǵan.
Dáslep «Awıl xojalıǵı táwekelshiliklerin qamsızlandırıw haqqında»ǵı nızam joybarı ekinshi oqıwda statyama-statya kórip shıǵıldı.
– Usı nızam joybarı menen awıl xojalıǵı islep shıǵarıwshılarınıń awıl xojalıǵı ónimlerin jetistiriwde tábiyǵıy apatshılıqlar, órt, ósimliklerdiń kesellikler hám zıyankeslerden zıyan kóriwi, sharwa haywanlarınıń juǵımlı kesseliklerden nabıt bolıwı hám záhárleniwi hám jabayı haywanlar tárepinen eginlerdiń búliniwi yamasa awıl xojalıǵı haywanlarına zıyan jetkeriliwi boyınsha qamsızlandırıw shártnamaların dúziw názerde tutılmaqta, – dedi deputat Abdumannop Bwriev. – Sonday-aq, awıl xojalıǵı qamsızlandırıwın mámleket tárepinen qollap-quwatlawdıń huqıqıy tiykarların belgilew, awıl xojalıǵı tarawında táwekelshiliklerdi qamsızlandırıw procesinde qatnasıwshı subyektlerdiń huqıq hám minnetleri kórsetilmekte.
Nızam joybarın ekinshi oqıwǵa tayarlaw dawamında normalardı durıs bildiriw, awıl xojalıǵı ónimin jetistiriwde qamsızlandırıw jeńilliklerin engiziw, awıl xojalıǵı qamsızlandırıwı tarawında xalıqaralıq qatnasıqlardı jolǵa qoyıw, usı tarawda muwapıqlastırıwshı mámleketlik uyımnıń wazıypaların anıq kórsetiw máselelerine ayrıqsha itibar qaratıldı.
Bunnan tısqarı, qamsızlandırıw sistemasın tolıq sanlastırıw maqsetinde awıl xojalıǵı qamsızlandırıwı málimleme sistemasın engiziw hám onda ónim jetistiretuǵın hám awıl xojalıǵı qamsızlandırıwı jumısına baylanıslı barlıq maǵlıwmatlardı toplaw hám málimlemeler almasıw imkaniyatın jaratıw, tarawdaǵı qamsızlandırıw hádiyselerin úyreniwde erkin ekspertlerdi tartıw hám olardıń erkinligin támiyinlewge baylanıslı normalar óz kórinisin tapqan.
Joybarda awıl xojalıǵı qamsızlandırıw qorın shólkemlestiriw, qordıń dáramatları hám qárejetleri, qamsızlandırıwı zárúr bolǵan táwekelshilikler, qamsızlandırıw sıylıqları boyınsha subsidiyalar beriwdiń huqıqıy tiykarları da belgilenbekte.
Statyama-statya dodalawlar dawamında deputatlar ayırım normalar boyınsha soraw hám usınıslardı ortaǵa tasladı. Atap ótilgenindey, nızam joybarınıń qabıl etiliwi menen mámleketimizde awıl xojalıǵı ónimlerin jetistiriwde qamsızlandırıw sisteması engiziledi hám ónim jetistiriwshilerge qolaylı sharayatlardı jaratıwǵa, awıl xojalıǵı eginlerine qáwip-qáterler sebepli zıyan jetken jaǵdaylarda zıyannıń ornın qaplawdıń huqıqıy tiykarı jaratıladı.
Nızam joybarı qabıl etilip, Senatqa jiberildi.

Muhtarama Komilova, ÓzA