Tutınıwshılarǵa tábiyǵıy gaz jetkerip beriwdi ele de jaqsılaw hám gaz tarmaqlarında gaz shıǵınların azaytıw maqsetinde, «Parkent tájiriybesi» tiykarında «Avtomatlastırılǵan máhálle tutınıw qadaǵalawı balansı» joybarı boyınsha mámleketimizdiń barlıq aymaqları sıyaqlı, Qaraqalpaqstanda da keń kólemli jumıslar ámelge asırılmaqta.

Atap aytqanda, usı tájiriybeni turmısta sınaw maqsetinde, házirgi waqıtta hár bir rayonnan bir aymaq tańlap alınıp, «Avtomatlastırılǵan máhálle tutınıw qadaǵalawı balansı» joybarı boyınsha jumıslar alıp barılmaqta.
Sonıń ishinde, Nókis rayonında joybar tiykarında Diyqan arna mákan puqaralar jıyını tańlap alınǵan. Házirgi kúni bul aymaqtaǵı 6 kóshede 106 xojalıq jaylasqan bolıp, ondaǵı gaz tarmaqlarınıń 1,3 kilometrlik bólegi jer ústinde jaylasqan.
-Tańlap alınǵan bul aymaqta joybar sheńberinde gaz támiynatı sisteması túp-tiykarınan jańalanıp hám hár bir xojalıqqa zamanagóy energiya únemlewshi gaz úskeneleri ornatıldı,-deydi Nókis rayonlıq gaz támiynatı bóliminiń «tabiygıy gaz obektlerinen nátiyjeli paydalanıw» bólimi qánigesi Azamat Biysenbaev.-Sonnan gaz esaplaw úskenelerine regulyatorlar ornatılıp, olar úsh basqıshlı sistemadan eki basqıshlı sistemaǵa ótkerilmekte. Elattıń kire berisindegi gaz retlew punktine gaz esaplaǵısh ornatılıp, barlıq kóshelerge qadaǵalaw sisteması jolǵa qoyılmaqta.
Sonı aytıp ótiwimiz kerek, bul avtomatlastırılǵan máhálle tutınıw qadaǵalawı balansı sistemasınıń iske túsiriliwiniń tiykarǵı maqseti, jıllıq gaz shıǵınlarınıń aldın alıw, sonday-aq, tutınıwshılarǵa jetkerip beriletugın tábiyǵıy gaz támiynatın jáne de jaqsılawdan ibarat.
Házirgi suwıq kúnleri de taraw qánigeleri tárepinen bul baǵdardaǵı jumıslar respublikamızdıń barlıq aymaqlarında qızǵın dawam etpekte.

Adilbay Orazov,
Qaraqalpaqstan xabar agentliginiń sholıwshısı.