Elimizde hayal-qızlardıń jámiyetlik-siyasiy hám sociallıq belsendiligin arttırıw, olardıń hár qıylı taraw hám tarmaqlarda óz qábilet hám imkaniyatların júzege shıǵarıwı ushın sharayat jaratıw, huqıqları menen nızamlı máplerine sózsiz ámel etiliwin támiyinlew, analıq hám balalıqtı qorǵaw, sonday-aq, shańaraq institutın bekkemlew baǵdarında keń kólemli jumıslar ámelge asırılmaqta.

ÓzLiDeP elimiz hayal-qızlarınıń ómirde jaqsı jasawı ushın barlıq sharayatlardı jaratıw jolında bir qatar nátiyjeli joybarlardı ámelge asırıp kelmekte.

Partiyanıń mine, usınday joybarlarınan biri bolǵan «Salamatlıqqa qaray» hám «Bir deputat – júz hayalǵa járdemshi» joybarları sheńberinde ótkerilgen gezektegi «ÓzLiDeP onkologiyalıq keselliklerge qarsı» akciyası Nókis qalalıq “REACENTR NUKUS” jeke menshik medicina mákemesinde shólkemlestirildi.

Járdemge mútáj hám awır sociallıq jaǵdayǵa túsip qalǵan hayal-qızlardı mánzilli qollap-quwatlaw, xalıq arasında keselliklerdi erte basqıshta anıqlaw, salamatlandırıw jumısların jaqsılaw, juqpalı kesellikler kelip shıǵıwınıń aldın alıwǵa qaratılǵan bul ilajda Xalıq deputatları Nókis qalalıq Keńesiniń deputatı Zamira Aytbaeva, Berdaq atındaǵı Qaraqalpaq mámleketlik universitetiniń pitkeriwshi student-qızları hám medicina xızmetkerleri qatnastı.

-Bul ilajdan gózlengen tiykarǵı maqset, hayal-qızlardıń reproduktivlik salamatlıǵın qorǵaw, tereńlestirilgen medicinalıq tekseriwden ótkeriw, emlew proceduraların belgilew, salamat turmıs tárizin úgit-násiyatlaw, sonday-aq, jaslardı shańaraqlıq turmısqa tayarlaw, shańaraqtı bekkemlew, tartıslı jaǵdaylar hám ajırasıwlardıń aldın alıw tarawında kadrlardıń mamanlıǵın arttırıw hám olardı qayta tayarlaw boyınsha jumıslardıń nátiyjeliligin arttırıw bolıp esaplanadı, – deydi deputat Zamira Aytbaeva.

Ilaj dawamında hayal-qızlar medicinalıq tekseriwlerden ótip ǵana qalmastan, usı medicina orayınıń jumısı menen jaqınnan tanıstı. Oray balalar arasında ushırasatuǵın nevrologiya hám refleksoterapiya kesellikleri, ásirese, házirgi waqıtta jámiyetimizde kóp ushırasıp atırǵan autizm keselligin emlep, jas analarǵa medicinalıq hám ruwxıy másláhátler berip kelmekte. Oraydıń defektolog shıpakeri Zuxra Sratdinovanıń atap ótiwinshe, házir dúnyadaǵı hár 88 balanıń birewinde autizm baqlanıp, onıń kelip shıǵıw sebeplerinen biri bul – hámile ana qarnındaǵı dáwirinde belgili bir túrdegi beloklardıń jetispewshiligi ekenligin aytadı.

Keselliktiń házirgi kúnde anıq emi joq ekenligi sebepli, shıpaker hayal-qızlar hám jas óspirim qızlardıń óz salamatlıǵına itibar qaratıwın, jılına 2 márte tereńlestirilgen medicinalıq tekseriwlerden ótip turıwın soradı.
Haqıyqatında da, perzentlerimizdiń hár tárepleme salamat hám bárkamal bolıp kamalǵa keliwinde shańaraq sham shıraǵı bolǵan hayaldıń salamatlıǵı áhmiyetli orın ieleydi. Hayal-qızlarımızdıń salamatlıǵında bolsa, óz waqtında ótkerilgen medicinalıq tekseriwler úlken áhmiyetke iye.

Qaraqalpaqstan xabar agentligi