MǴKAda shólkemlestirilgen brifingte Shańaraq hám hayal-qızlar komiteti málimleme xızmetiniń basshısı Saodat Boymirzaeva tarawda ámelge asırılıp atırǵan jumıslar haqqında maǵlıwmat berdi.

Atap ótiliwinshe, basım hám zorlıqtan jábirlengen 5 mıń 472 hayal-qızdıń shańaraqları menen islesiwdiń nátiyjesinde 2 mıń 546 shańaraq jarastırılǵan. 2 mıń 747 shańaraqtaǵı kelispewshilikler saplastırılǵan. 12 hayal Hayal-qızlardı reabilitaciyalaw hám beyimlestiriw oraylarına jiberilgen.
Sonday-aq, profilaktikalıq esapta turǵın 489 hayal-qızdıń jumısqa ornalasıwına járdemlesildi, 624 ine materiallıq hám sociallıq járdemler kórsetildi, 196 sınıń emleniwge zárúrligi anıqlanıp, medicinalıq mákemelerge jaylastırıldı.
271ine shaxsın tastıyıqlawshı hújjetlerdi qayta tiklewde ámeliy járdem kórsetilip, 73 qız bilimlendiriw mákemesine qaytarıldı hám 25i Hayal-qızlardı reabilitaciyalaw hám beyimlestiriw oraylarına jiberildi.
Qánigeniń sózlerine qaraǵanda, shańaraq institutın bekkemlew boyınsha nızamshılıq hújjetleriniń orınlanıwın támiyinlew, shańaraq-turmıs qatnasıqları sheńberinde hám hayal-qızlar arasında huqıqbuzarlıqlardıń erte aldın alıw, hayal-qızlardı hám balalardı basım hám zorlıqtan qorǵaw, shańaraqta huqıqıy mádeniyattı arttırıw maqsetinde Shańaraq hám hayal-qızlar komiteti jáne Ishki isler ministrligi menen birgelikte usı jıldıń 3-31-mart kúnleri «Shańaraq huqıqı» úgit-násiyat aylıǵı ótkeriledi.

Qaraqalpaqstan xabar agentligi