Medicina tarawında xalıqaralıq birge islesiw hám sırt el tájiriybesin elimizge alıp kiriw boyınsha, Densawlıqtı saqlaw ministrligi tárepinen bir qatar unamlı ilajlar ámelge asırılmaqta.

Usı jıldıń 20-25-fevral kúnleri aralıǵında Qaraqalpaqstan Respublikası Densawlıqtı saqlaw ministri M.Qurbanovtıń basshılıǵındaǵı delegaciya aǵzaları Hindstan mámleketinde xızmet saparında boldı.
Elimizden kelgen delegaciya aǵzaları kópshilikke belgili “Sharda Hospital” klinikasınıń direktorı mırza Gopta tárepinen qızǵın kútip alındı hám ol jerde tájiriybeli shıpakerler hám basqa da qánigeler menen pikir alısıp, klinikada jaratılǵan imkaniyatlar menen tanısıp shıqtı.
Sonday-aq, Qaraqalpaqstan Respublikası Densawlıqtı saqlaw ministri M.Kurbanov xızmet saparı dawamında “Sharda Hospital” klinikasınıń direktorı mırza Gopta menen densawlıqtı saqlaw tarawın rawajlandırıw maqsetinde óz-ara birge islesiw boyınsha Memorandumǵa qol qoydı.
– Memorandum tiykarında elimizde bir qatar unamlı jumıslar ámelge asırıladı. Yaǵnıy, usınday aralıqtan birge islesiwler sheńberinde, sırt el medicinasınıń tájiriybesin elimizde qollanıw hám medicina xızmetkerlerin sırt ellerde oqıtıp, tájiriybelerin arttırıw názerde tutılǵan. Solay eken, bunday xızmet saparları bir jaǵınan sırt elli kásipleslerimiz benen tájiriybe almasıw bolsa, ekinshi jaǵınan medicina turizminiń rawajlanıwına sebep boladı. Álbette, rawajlanǵan medicina bar jerde, nawqaslar ushın da hár tárepleme imkaniyatlar jaratıladı. Mámleketimizde medicina qansha rawajlansa, puqaralar ushın qolaylıqlar boladı,-deydi ministrliktiń investiciyalardı tartıw jáne mámleketlik-jeke menshik sheriklik hám aucorsingti rawajlandırıw sektorınıń bas qánigesi Zamira Paluaniyazova.
Bul baǵdardaǵı ilajlar dawam etpekte.

Qaraqalpaqstan xabar agentligi.