Keshe Tashkent qalasında «Yunusobod» sport kompleksinde dzyudo boyınsha «Úlken Duwlıǵa» dúrkinine kiriwshi jarıs óz juwmaǵına jetti.

Úsh kún dawam etken bellesiwler juwmaǵında, Ózbekstan saylandı komandası 1 altın, 3 gúmis hám 8 qola medalın qolǵa kirgiziwge miyasar boldı.
Qaraqalpaqstanlı sport jankúyerleri ushın áhmiyetli tárepi sonda, bul jarısta Ernazar Sarsenbaev ta qatnastı.
Atap aytqanda, ol dáslepki basqıshta tájikstanlı Karomatullo Hakimovtı jeńgen bolsa, ekinshi turda kubalı Silva Moraleske jeńilip qaldı. Bunnan soń ol qola medalı ushın bellesiwge qatnasıw huqıqın qolǵa kirgiziw ushın qazaqstanlı Biybit Madiev penen gúresti hám onı jeńip shıǵıwǵa eristi.
Al, qola medalı ushın bellesiwde yaponiyalı Miki Nozomudı golden-skor yaǵnıy, qosımsha minutlarda jeńip shıǵıwǵa miyasar boldı hám «Úlken Duwlıǵa» dúrkinine kiriwshi jarıslardaǵı óziniń dáslepki medalına iye boldı.
Jerlesimizdi bul tabısı menen qızǵın qutlıqlaymız.

Adilbay Orazov,
Qaraqalpaqstan xabar agentliginiń sholıwshısı.