Ámiwdárya rayonında húrmetli Prezidentimiz tárepinen belgilep berilgen jańa sistema tiykarında «Xalıqtıń qıytaq jer hám ijara jerlerinen nátiyjeli paydalanıwı arqalı dáramatların arttırıw ilajları» atamasında kórgizbeli seminar baslanǵanı tuwralı aldın xabar bergen edik.

Ilajda Ózbekstan Respublikası Prezidentiniń keńesgóyi T.Xudaybergenov, Ózbekstan Respublikası Prezidenti keńesgóyiniń orınbasarı-Prezident Xalıq qabıllawxanası baslıǵı U.Muhammadiev, Ministrler Keńesiniń Baslıǵı F.Еrmanov qatnastı.
Seminar sheńberinde qatnasıwshılar rayondaǵı «Jayxun» APJdaǵı «Nukus Dilisha» JShJ tárepinen iske túsirilgen «Un islep shıǵarıw» joybarınıń ashılıw máresiminde boldı.
Miymanlar kárxana jumısları menen jaqınnan tanıstı.
Sonday-aq, isbilermen tárepinen islep shıǵarılıp atırǵan ónimler kórgizbesi jıynalǵanlardıń názerine usınıldı.
Bunnan soń, seminar qatnasıwshıları «Choykwl» APJdaǵı M.Narbaev tárepinen qıytaq jerinde hám diyqan xojalıǵında shólkemlestirilgen ıssıxana, sonday-aq, «Orta qala» APJda qıytaq jerindegi 1 gektar maydanda shólkemlestirilgen ıssıxanadan mol ónim alıp atırǵan R.Yusupovtıń jumısı menen tanıstı. Ol jerde puqaralar tárepinen kooperaciya tiykarında shólkemlestirilgen ıssıxanalarda nál hám ovosh jetistiriw jumısın kózden ótkerdi.
Seminar dawamında «Choykwl» APJ aymaǵında «Jasıl mákan» ulıwma milliy joybarı sheńberinde terek nállerin egiw ilajı shólkemlestirilip, onda 2 gektar jer maydanǵa miyweli terek nálleri egildi.
Ilajda jaslar, nuranıylar, Respublika, qala hám rayon sektor basshıları qatnastı.
Bunnan soń «Chordara» MPJdaǵı «Tomorqa xizmati» JShJ tárepinen xalıqqa 12 baǵdarda xızmet kórsetiw hám 1 gektar maydanda shólkemlestirilgen ıssıxananıń jumısları kózden ótkerildi.
Sonday-aq, ilaj dawamında belsendi qıytaq jer iyeleri hám fermer xojalıqları basshılarına arnawlı texnikalar saltanatlı túrde tapsırılıp, húrmetli Prezidentimizdiń Qaraqalpaqstan ushın ayrıqsha qabıl etilgen qarar hám pármanları tiykarında jaratılǵan imkaniyatlarına keń túrde toqtap ótildi.
Bunnan keyin, seminar sheńberinde aldaǵı wazıypalardı belgilep alıw máselelerine arnalǵan májilis ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Prezidenti keńesgóyiniń orınbasarı-Prezident Xalıq qabıllawxanası baslıǵı U.Muhammadiev, Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Z.Mahkamova shıǵıp sóyledi.
Májiliste orınlardaǵı awır sharayattaǵı máhállelerdi abat etiw, puqaralardıń qıytaq jerden nátiyjeli paydalanıw mádeniyatın arttırıw, «bir máhálle bir ónim» ólshemi tiykarında jumıslardı shólkemlestiriw hám puqaralar tárepinen kooperaciyalar dúziliwine járdemlesiw, eń baslısı, Prezidentimiz tárepinen belgilep berilgen wazıypalardıń sózsiz orınlanıwın támiyinlew boyınsha áhmiyetli máseleler sóz etildi.

Qaraqalpaqstan xabar agentligi