Respublikamızda talantlı jaslar ózleriniń estrada qosıqshılıǵı baǵdarındaǵı qábiletlerin júzege shıǵarıwı ushın shólkemlestirilgen «Yosh» joybarınıń 1-máwsimi juwmaqlanıp, 2-máwsimi óz jumısın basladı. Joybardıń 1-máwsim jeńimpazı jas talant iyesi, sheber atqarıwshı Ázim Qalbaev penen sáwbetlestik.

– Muzıkaǵa qızıǵıwshılıǵıńız qashan baslandı?
– Men balalıqtan qosıq aytıwǵa, saz ásbapların shertiwge qızıǵatuǵın edim. Hár kúni anama «jeke koncert baǵdarlama»mdı qoyıp berip, onıń meni maqtap «Meniń balam xalıq súygen, úlken qosıqshı boladı» dep aytqan gápine más bolıp otıratuǵın edim. Muzıkaǵa qızıǵıwshılıǵımdı kórgen anam meni 3-klass waqtımda Esjan baqsı atındaǵı balalar muzıka kórkem óner mektebiniń rubab atqarıwshılıǵı bóliminea oqıwǵa alıp bardı. Ol jerde 9-klassqa shekem rubab saz ásbabın shertiwdiń sırların úyrenip, muzıkalıq bilimimdi teoriyalıq jaqtan bayıtıp bardım. 6-klass waqıtlarımda Nókis qalalıq Mádeniyat bólimine qaraslı «Arzıw» estrada xalıq ansambline qatnasa basladım. Dáslep qaraqalpaq xalıq qosıqların atqardım. 11-klasstı tamamlap Berdaq atındaǵı Qaraqalpaq mámleketlik universiteti Kórkem óner fakulteti Vokal atqarıwshılıǵı qánigeligine oqıwǵa tapsırdım. 2019-2023-jıllar dawamında usı jerde oqıp, vokal atqarıwshılıǵı boyınsha barlıq bilimlerdi alıwǵa háreket ettim. Studentlik dáwirimde muzıkaǵa degen ıqlasım jáne de arttı.
– Ustazlarıńız haqqında aytıp ótseńiz.
– Meniń birinshi ustazım Esjan Baqsı atındaǵı balalar muzıka hám kórkem óner mektebinde rubab saz ásbabın shertiwdi úyretken insan Muxtar Raxmanov. Birinshi márte rubabta «Yosh» qosıǵın shertiwdi úyrengenmen.
«Arzıw» estrada xalıq ansamblinde maǵan Dáwlet aǵa Doshımov ustazlıq etti. Qaraqalpaq xalıq qosıqların atqarıw boyınsha barlıq bilimlerin berdi. Oǵada talapshań ustaz boldı. Abiturientlik dáwirlerimde opera atqarıwshısı Dáribay Xojabergenov meni tayarladı hám sol insannıń miynetleriniń arqasında student bolıwday úlken baxıtqa miyassar boldım. Studentlik waqıtlarımda Ózbekstan, Qaraqalpaqstan hám Qazaqstanǵa xızmet kórsetken artist, tájiriybeli ustaz, kúshli opera atqarıwshısı Roza Qutekeeva maǵan vokal atqarıwshılıǵı boyınsha ustazlıq etti. Men ol insannan kóplegen bilimlerdi aldım. Meni opera baǵdarına qızıqtırdı.
– «Yosh» joybarınıń abzallıǵı nede dep oylaysız?
– Bakalavrdı tamamlap magistraturada oqıwdı Qazaqstan mámleketinde dawam etpekshi edim. Shańaraqlıq sebeplerge baylanıslı bul oyım ámelge aspay qaldı. Soń «Yosh» joybarı haqqında reklamalarda kórip qaldım. Barlıq jaslar usı joybar haqqında aytatuǵın edi. Men de qızıǵıp qaldım hám dekabr ayında bolıp ótken kastingke qatnastım. Kastingde 153 jas atqarıwshı qatnasqan bolsa, sonnan 20 qatnasıwshı saylap alındı. Men de olardıń arasında boldım. Bul men ushın úlken baxıt edi. Saylap alınǵanlardıń arasında Zarima Maxsudova, Shıraz Piraliev, Xurliman Muxamedalieva sıyaqlı oǵada talantı qosıqshılar bar edi. Barlıǵı ózine tán dawıs iyeleri.
6 basqıshta «bellesiwler» bolıp ótti. Men 1-basqıshta Dimash Quybergenniń «If I never breathe again» qosıǵın, 2-basqıshta Dáwlet Atajanovtıń «Muhabbatıńnan», 3-basqıshta qatnasıwshı Xurliman Muxammedalieva menen Sevara Nazarxon hám Rashid Xalikovtıń «Bir kam dunyo» hám Maqset Ótemuratovtıń «Kewil», 4-basqıshta Shamannıń «Tı moya», 5-basqıshta Imagine Dragonnıń “Believer” hám Islam Muratpaev penen duet «Ayamadım», final basqıshta Begzad Allaniyazovtıń «Kelmediń» hám qazaq xalıq qosıǵı «Daydidaw» qosıqların atqardım.
Finalda 7 qatnasıwshı qaldıq. Hár basqıshta «qızıl aymaq»qa túsken qatnasıwshılar joybardı tárk etti. Onda Allanıń qálewi menen birinshi orındı iyeledim. Barlıǵı ustazlarımnıń bergen bilimi hám qızıǵıwshılıǵımnıń arqasında dep oylayman. Hár kúni kúshli tayarlıq alıp bardım. Universitetti pitkerip ketken bolsamda, sol jerge studentlerden soń barıp tayarlanıp júretuǵın edim. Joybar dawamında repertuar tańlawda kóp oylanıp qalatuǵın edim, bunday waqıtlarda maǵan anam, ustazlarım, doslarım kóp járdem berdi.

Rasın aytsam jeńimpaz bolaman dep hesh oylamadım. Maqsetim xalıqtıń názerine túsip, ózimniń ónerimdi kórsetiw ǵana bolǵan. Jeńimpaz bolǵanımnan oǵada quwanıshlıman.
– Miynettiń jemisi degende neni túsinesiz?
– «Watannıń rawajlanıwına meniń úlesim» tańlawınıń respublikalıq basqıshında birinshi orındı, «Dillarda Vatan madhi» tańlawınıń respublikalıq basqıshında birinshi orındı iyelep 5 million sumlıq vaucher menen sıylıqlandım. Soń usı tańlawdıń Ózbekstan Respublikalıq basqıshda qatnasıp 3-orınǵa ılayıq kórildim hám 8 million sumlıq vaucher menen sıylıqlandım.
Sonday-aq, «Botir Zokirov» tańlawınıń respublikalıq basqıshında 2-orınǵa miyassar dep tabıldım hám Ózbekstan Respublikalıq basqıshında kúshli onlıqqa kirdim. Qaraqalpaqstan telekanalında efirge uzatılǵan «Talant shou» konkursında 1-orın jeńimpazı bolǵanman. Bunnan basqa da kóplegen tańlawlarda qatnasıp sıylı orınlardı iyelep atırman. Miynettiń jemisi, erisilgen tabıslarda, dep túsinemen.
Keleshekte bilimlerimdi, talantımdı jáne de arttırıp dúnya júzi kólemindegi tańlawlarda qatnasıp, elimizdi dúnyaǵa tanıtıwdı ózimniń eń baslı maqsetlerim etip qoyǵanman.
Biz jaslarǵa usınday imkaniyat jaratıp berip atırǵan basshılarǵa, joybar shólkemlestiriwshilerine úlken minnetdarshılıq bildiremiz.

Qaraqalpaqstan xabar agentligi