Qarar hám onıń orınlanıwı

Ózbekstan Respublikası Prezidentiniń 2025-jıl 14-fevraldaǵı “Qıytaq jer iyeleri hám diyqan xojalıqlarınıń jumıslarına zamanagóy shólkemlestiriwshilik sistemasın engiziw hám qarjılay qollap-quwatlawdıń qosımsha ilajları haqqında”ǵı pármanınıń orınlanıwın támiyinlew maqsetinde, Qaraqalpaqstan Respublikası Agrosanaattı rawajlandırıw agentligi qánigeleri tárepinen Ámiwdárya rayonında ıssıxanalardan nátiyjeli paydalanıw boyınsha xalıqtıń qıytaq jerlerinde ıqsham ıssıxanalar shólkemlestirip, jılına 2-3 márte ónim alıw hám limonshılıqtı rawajlandırıw boyınsha ámeliy usınıslar berildi.
Sonday-aq, ıssıxanalarda palız ónimlerin jetistiriwde tamshılatıp suwǵarıw sistemasınıń abzallıqları haqqında túsindiriw jumısları alıp barıldı.
Tiykarınan ıssıxanada nállerdi tárbiyalawda qıytaq jer iyelerine keń túrde túsinik jumısları alıp barılıp, atap aytqanda, olardı tárbiyalaw, mineral tóginler menen azıqlandırıw, zıyankeslerden qorǵaw boyınsha usınıslar aytıp ótildi.
Maǵlıwmat ushın, bul ıssıxanada tiykarınan bolgar burıshı hám pomidor eginleri egilip, suwdan nátiyjeli paydalanıw maqsetinde suwdı únemlewshi tamshılatıp suwǵarıw sisteması engizilmekte.

Qaraqalpaqstan xabar agentligi.