Búgin Oliy Majlis Nızamshılıq palatasına ÓzMTDPdan saylanǵan deputat Ruslan Djumamuratov Nѳkis qalasındaǵı Anasay mákan puqaralar jıyınında bolıp, máhálle «jetilik»leri menen ushırastı.

Ilaj dawamında deputat tárepinen mámleketimizde nızamshılıqta júz berip atırǵan ózgerisler hám jańalıqlar, qabıl etilip atırǵan párman, nızam hám qararlardıń mazmunı hám áhmiyeti haqqında maǵlıwmatlar berildi.
Sonday aq, “Kámbaǵallıqtan abadanlıqqa qaray” baǵdarlamasınıń ámelge asırılıwında máhálle “jetilik”leri tárepinen ámelge asırılıp atırǵan jumıslar, pikir-usınıslar tıńlandı.
– Máhálle «jetiligi» – mákan puqaralar jıyını baslıǵı, xákim járdemshisi, jaslar jetekshisi, hayal-qızlar belsendisi, profilaktika inspektorı, sociallıq xızmetker hám salıq inspektorınıń jumıs ѳnimdarlıǵı olardıń hár biriniń ѳz jumıslarına bolǵan juwapkershiligine tikkeley baylanıslı,-deydi Anasay MPJnıń hayal-qızlar belsendisi Gúlnara Esebaeva. – Búgingi sáwbetlesiw dawamında usı baǵdardaǵı jumıslarımızdıń nátiyjeliligin arttırıwǵa qaratılǵan bir qatar maǵlıwmatlarǵa iye boldıq.
Aymaqta xalıqtıń sanı 5865, al shańaraqlar sanı 1128 bolıp, olardıń jergilikli transporttan paydalanıw talabın qanaatlandırıw maqsetinde 65-sanlı jѳnelisli taksiler sanın kѳbeytiw, sonday aq, puqaralardıń qıytaq jerlerinen ѳnimli paydalanıw maqsetinde aqaba suw menen támiyinlew baǵdarında bir qatar múrájat hám usınıslar bildirildi.
Deputat tárepinen bul máseleler tiyisli tártipte qadaǵalawǵa alındı.

Qaraqalpaqstan xabar agentligi