Kúni keshe Ózbekstan Respublikası Mektepke shekemgi hám mektep bilimlendiriwi ministrligi tárepinen mobil tájiriybe arttırıw xızmetleri tiykarında shólkemlestirilgen avtobuslardı aymaqlarǵa tarqatıw ilajı bolıp ótip Tashkent qalasınan óz mánzillerine jol alǵan edi.

Bul mobil tájiriybe arttırıw xızmetleri respublikanıń alıs hám shetki aymaqlarında jaylasqan mektepke shekemgi bilimlendiriw shólkemleriniń pedagog kadrları ushın engizilgen bolıp, tájiriybe-sınaw túrinde usı avtobuslar Qaraqalpaqstan Respublikası, Qashqadárya, Nawayı hám Samarqand wálayatlarına berildi.
Mobil tájiriybe arttırıw xızmetleri tórt auditoriya kórinisindegi qayta úskenelengen avtobuslar negizinde shólkemlestirilgen.
Búgin Qaraqalpaqstan Respublikası Pedagogikalıq sheberlik orayı ushın ajıratılǵan avtobus Nókis qalasına jetip keldi.
Orayda Qaraqalpaqstan Respublikası Mektepke shekemgi hám mektep bilimlendiriwi ministrligi, Pedagogikalıq sheberlik orayınıń basshıları, taraw qánigeleriniń qatnasıwında usı avtobustıń tapsırılıw máresimi ótkerildi.
Ilajda atap ótilgenindey, Ózbekstan Respublikası Prezidentiniń 2024-jıl 30-sentyabrdegi tiyisli pármanına tiykarlanıp usı jıldıń 1-martınan baslap tájiriybe-sınaw tárizinde respublikanıń alıs hám shetki aymaqlarında jaylasqan mektepke shekemgi bilimlendiriw shólkemlerindegi pedagog kadrlar ushın mobil qánigelik arttırıw xızmetlerin engiziw belgilengen.
– Avtobuslar bir waqıttıń ózinde 14 pedagogqa sabaq ótiw ushın oqıw orınları, 10 NR markalı noutbuk, 1 dana 65 dyuymlı interaktiv monitor, jazıw doskası, 1 internet tarqatıwshı qurılma WI FI router menen qayta úskenelengen. Bul avtobustan uzaq hám shetki aymaqlarda jasaytuǵın mámleketlik hám jeke menshik mektepke shekemgi bilimlendiriw shólkemleriniń pedagog kadrları ushın mobil qánigelik arttırıw xızmetlerin kórsetiw, yaǵnıy úzliksiz kásiplik rawajlandırıw (“metodikalıq sheberlik kúni” hám “metodikalıq sheberlik sabaǵı”) ilajların tiyisli aymaqlarǵa barǵan halda ótkeriw, trening, seminar hám basqa da ilajlardı shólkemlestiriw maqsetinde paydalanıladı. Pedagoglarǵa ózleri jasaytuǵın hám jumıs isleytuǵın orınlarınan uzaqlaspaǵan halda úzliksiz kásiplik rawajlanıwı, bilimlerin jańalap barıwı arqalı mektepke shekemgi bilimlendiriwdiń sapasın arttırıw imkaniyatları jaratıladı. Avtobuslar treningler, seminarlar hám ámeliy sabaqlardı ótkeriw ushın barlıq zárúr úskeneler menen tolıq támiyinlengen,-deydi oray direktorınıń orınbasarı Ámirxan Qayıpnazarov.
Bunday mobil avtobustıń jolǵa qoyılıwı, álbette, alıs awıllardaǵı mektepke shekemgi bilimlendiriw shólkemlerinde jumıs islep atırǵan hayal-qızlardı Nókiske áwere bolıp kelip, háptelep qánigeligin arttırıw sabaqlarına qatnawdan qutqarıp, óz shańaraǵınıń janında bolıwına hám basqa da ruwxıy, materiallıq zıyanlardıń aldın alıwǵa járdem beredi.

Á.Jiyemuratov,
Qaraqalpaqstan xabar agentligi