Bul haqqında AOKAda ótkerilgen brifingte Din isleri boyınsha komiteti málimleme xızmetiniń basshısı Ilham Mayrupov málim etti.

Qánigeniń atap ótiwinshe, 2024-jılı 14 jańa meshit mámleketlik dizimnen ótkerilgen hám búgingi kúnde respublika boyınsha 2 mıń 145 meshit jumıs alıp barmaqta. 64 meshitte túp-tiykarınan qayta qurıw hám 17 meshitte ońlaw jumısları juwmaqlandı. Házirgi waqıtta respublikamızda 198 islamiy emes diniy shólkem bar.
Ózbekstan hám Kavkaz musılmanları mákemesi, Qazaqstan hám Qırǵızstan musılmanları diniy basqarmaları, Túrkiyanıń Diyonat basqarması Pátwa komissiyalarınıń juwapkerleri jáne Túrkiy mámleketler shólkemi wákilleriniń qatnasıwında onlayn májilisler shólkemlestirildi.
Sóylesiwlerde 2025-jılı Ramazan ayınıń baslanıwı hám Ramazan hayttıń birinshi kúnin anıqlaw máseleleri dodalandı. Pátwa komissiyaları aǵzalarınıń arasında Ramazan ayınıń birinshi kúni 1-mart, shembi kúnine tuwra keliwi boyınsha bir awızdan anıq juwmaq shıǵarıldı.
Usı pazıyletli ayda «Ramazan – saqıylıq, tatıwlıq hám keńpeyillik ayı» ideyası tiykarında mútájler hám ilim-aǵartıwshılıq jolında izlenip atırǵan jaslarǵa járdem beriw boyınsha baslamalardı qollap-quwatlaw, shańaraqlıq baylanıslardı bekkemlew, máhállelerde óz-ara túsinisiw hám isenim ortalıǵın kúsheytiw jáne húrmet hám miyrim-shápáát qádriyatların úgit-násiyatlawǵa, qorshaǵan ortalıqtı qorǵaw, muqaddes orınlar, zıyaratxana hám qoyımshılıqlardı abadanlastırıw, náller egiw hám Ramazan ayı menen baylanıslı ilajlarda belgilengen normaǵa ámel etiw hám ısırapgershilikke jol qoymawǵa ayırıqsha itibar qaratıw sıyaqlı wazıypalar rejelestirilgen.
Múbárek Ramazan ayın múnásip túrde ótkeriw, elimizdegi mómin-musılmanlarǵa hár tárepleme qolaylı sharayatlar jaratıw hám imam-kátiblerdiń juwapkershiligin bunnan bılay da arttırıw boyınsha Din isleri boyınsha komiteti hám Ózbekstan musılmanları mákemesiniń birgeliktegi baǵdarlaması jáne Media reje islep shıǵıldı.
Bıyılǵı Ramazan ayında respublikada jumıs alıp barıp atırǵan 2 mıń 145 meshitten 1 mıń 743 inde xatım Quran ilajların ótkeriw rejelestirilmekte.

Muhayyo Toshqoraeva,
ÓzA