Háyyiw – bul analardıń perzentlerine bolǵan sheksiz mehiri, kempir apalarımızdıń aq pátiyası, kewlindegi ullı úmiti. Hár bir hayal – besik terbetip aytqan háyyiwi menen gózzal, jáne qádirli.

Usınday bay miyraslarımızdı filial student – qızları arasında úgit-násiyatlaw, sonday-aq, olardıń mámleketimizde ámelge asırılıp atırǵan keń kólemli reformalarǵa belsene qatnasıwın támiyinlew, bos waqıtların mazmunlı ótkeriw, qızlarımızdı úlken turmısqa, shańaraqqa, keleshekte ana bolıwǵa tayarlaw maqsetinde, Ózbekstan mámleketlik dene tárbiyası hám sport universiteti Nókis filialında «Analar háyyiw aytqanda» atamasında tańlaw bolıp ótti.
Tańlawdı «Sport túrleri» fakulteti dekanı D.Nurıshov kiris sóz benen ashtı hám barlıq qatnasıwshılarǵa tabıslar tiledi.
Shólkemleskenlik penen ótken tańlawǵa filialdıń barlıq qánigeliklerinen student-qızlar qatnastı.
Tańlaw shártleri boyınsha tóreshiler tárepinen qatnasıwshılardıń háyyiw aytıw sheberligi, janlı hawazda qosıq atqarıwı hám onıń mazmunına ayrıqsha itibar qaratıldı.
Qızıqlı ótken tańlaw sońında, birinshi orındı «voleybol» qánigeliginiń studenti Periyzat Baltabaeva iyelewge miyasar boldı.
Al, sıylı ekinshi hám úshinshi orınlardı «kórkem gimnastika» qánigeliginiń studenti Miyasar Xojambergenova, «velosport» qánigeliginiń studenti Dúrdana Akmanova hám «karate-do» qánigeliginiń studenti Shaxnoza Urazbaevalar jeńip aldı.
Tańlaw sońında jeńimpazlar hám belsene qatnasıwshılarǵa shólkemlestiriwshiler tárepinen tayarlanǵan arnawlı diplom, Húrmet jarlıǵı hám estelik sawǵaları tapsırıldı.

Adilbay Orazov,
Qaraqalpaqstan xabar agentliginiń sholıwshısı.