Elimizde xalıqtıń sociallıq qorǵawǵa mútáj qatlamların mámleket tárepinen sociallıq qollap-quwatlaw ilajları menen qamtıp alıw, sociallıq járdem hám xızmetler kórsetiwdiń jámiyetlik ádillik normasına tiykarlanǵan ashıq-aydın hám sanlastırılǵan jańa sistemasın engiziw boyınsha sistemalı reformalar ámelge asırılmaqta.

«Kámbaǵallıqtan abadanlıqqa qaray» baǵdarlaması sheńberinde hár bir puqaranı ózi hám perzentleriniń keleshegi ushın juwapkershilik penen qatnas jasawǵa shaqıratuǵın hám potencialın júzege shıǵarıw ushın imkaniyat jaratıw jáne sociallıq xızmet hám járdem kórsetiwdiń kólemin keńeytiw arqalı shańaraqlardıń miynet etiw imkaniyatın shekleytuǵın sebeplerdi saplastırıwǵa ayrıqsha itibar qaratılmaqta.
«Insan» orayları tárepinen awır awhalǵa túsip qalǵan hám qıyın jaǵdayǵa túsip qalıw qáwpi joqarı bolǵan adamlar menen shańaraqlarǵa tikkeley máhálle dárejesinde komplekli qatnas jasaw tiykarında 102 túrdegi professional sociallıq xızmetler kórsetilmekte.
Prezidentimizdiń usı jıl 30-yanvardaǵı «Xalıqtı sociallıq qorǵaw sistemasın qarjılandırıw tártip-qaǵıydaların jetilistiriw haqqında»ǵı pármanı usı tarawdaǵı reformalardıń logikalıq dawamı boldı.
Bul hújjet penen 2025-jıl 1-aprelden baslap «Sociallıq dápterler» qorları arqalı kórsetiletuǵın sociallıq járdemler Kámbaǵal shańaraqlardıń reestirine kirgizilgen shańaraqlarǵa, turaq jay sharayatların jaqsılaw hám densawlıqtı saqlaw boyınsha sociallıq járdemler bolsa aylıq dáramatı shańaraq aǵzalarınıń hár birine minimal tutınıw qárejetleri muǵdarınıń 2 esesinen kóp bolmaǵan shańaraqlarǵa da beriliwi belgilengen.
Sonıń menen birge, 1-aprelden baslap, «Hayal-qızlar dápteri» hám «Jaslar dápteri» qorları arqalı isbilermenlik jumısın baslaw hám ózin-ózi bánt etiwge zárúr bolǵan ásbap-úskeneler, miynet quralları, tuqımlıq hám náller satıp alıw ushın tólenetuǵın ssuda hám subsidiyalar ajıratıladı.
Sonday-aq, kámbaǵal shańaraqlar reestrine kirgizilgen shańaraqlar ushın «Sociallıq dápterler» qorları arqalı qollap-quwatlawdıń jańa instrumentleri engiziledi. Oǵan bola, sociallıq joybarlardı qarjılandırıw ushın tiyisli túrde «Hayal-qızlar dápteri», «Jaslar dápteri» hám «Saqawat hám járdem» qorlarınıń esabınan bazalıq esaplaw muǵdarınıń 60 esesine shekem grantlar ajıratıladı.
Bul haqqında Oliy Majlis Nızamshılıq palatasınıń Kámbaǵallıqtı qısqartıw baǵdarındaǵı jumıslardıń jaǵdayın úyreniw boyınsha jumısshı toparı, Miynet, densawlıqtı saqlaw hám sociallıq máseleler komiteti jáne XDP frakciyası menen birgelikte ótkerilgen «Xalıqtı sociallıq jaqtan qorǵaw sistemasın qarjılandırıwdıń jańa mexanizmleri» temasındaǵı seminarda aytıp ótildi.
Seminarda Sociallıq qorǵaw milliy agentliginiń juwapker adamları tárepinen aymaqlarda sociallıq xızmetler kórsetiw hám onda «Insan» oraylarınıń ornı, jumısı hám olardaǵı sociallıq qatlamǵa kórsetiletuǵın 102 túrdegi xızmetler boyınsha hár tárepleme maǵlıwmatlar berildi.

Muhtarama Komilova,
ÓzAnıń xabarshısı