Tashkentte Ózbekstan – Qıtay biznes forumı bolıp ótti. Oǵan Chjenchjou qalasınan qıtaylı delegaciya hám ózbek isbilermenleriniń wákilleri qatnastı.

Ánjumanda eki tárepleme birge islesiwdi rawajlandırıw máseleleri dodalaw orayında boldı.
Onda shıǵıp sóylegenler tárepler arasında paydalı isbilermenlik ortalıǵı bekkemlenip atırǵanı bir qatar tarawlar, atap aytqanda, avtomobil qurılısı, awıl xojalıǵı, azıq-awqat sanaatı, qurılıs hám bilimlendiriw sıyaqlı áhmiyetli tarmaqlar boyınsha birge islesiw baylanısların ornatıw imkaniyatın jaratıp atırǵanın atap ótti.
Atap ótilgenindey, áhmiyetli tábiyǵıy resurslarǵa hám strategiyalıq jaqtan qolaylı geografiyalıq statusqa iye bolǵan Ózbekstanda awıl xojalıǵı, jeńil sanaat hám qurılıs materialların islep shıǵıw jedel rawajlanbaqta. Bul bolsa Qıtaydıń «Haoshangni Health Food Co., Ltd» hám «Goden Beans Agriculture Co., Ltd» sıyaqlı kompaniyalarınıń elimizdiń awıl xojalıǵı ónimlerin satıp alıw kólemin keńeytiw sharayatın jaratıp atır. Bunday zárúrlik jergilikli óndiriwshilerge Aziyanıń eń iri bazarına shıǵıw imkaniyatın jáne de keńeytedi.
Forumda avtomobillerdiń komplektlewshi bólekleri tarawında birge islesiwge ayrıqsha itibar qaratıldı. Sonday-aq, Qıtaydıń ekologiyalıq taza qurılıs materialların islep shıǵıwǵa qánigelesken «Henan Hongju Group» kompaniyası Ózbekstandaǵı qurılıs joybarlarına investiciya kirgiziwge tayar ekenin málim etti. Bul mámleket infrastrukturasın rawajlandırıw hám jańa jumıs orınların jaratıwda áhmiyetli qádem bolıwı múmkin.
Bunnan tısqarı, «Henan Gaohui Education Technology Co., Ltd.» kompaniyası kásip-óner bilimlendiriwi hám tillerdi oqıtıw tarawında birge islesiwdi usınıs etti. Bunday baslamalar ózbekstanlı qánigelerdiń mamanlıǵın arttırıw hám eki mámleket arasındaǵı mádeniy baylanıslardı bekkemlewge keń jol ashadı.
– Awıl xojalıǵı, qurılıs hám bilimlendiriw sıyaqlı tarawlarda birge islesiw ushın salmaqlı potencial bar ekenin kórmektemiz. Ózbekstan tárepi sapalı ónimler hám biznes júrgiziw ushın qolaylı sharayatlardı usınıwǵa tayar. Soǵan bola, hár eki tárep forumda óz imkaniyatları boyınsha tanıstırıwlar ótkerdi. Álbette, bul ushırasıw keleshekte ámeliy nátiyjelerdi beredi, – dedi eksporttı xoshametlew boyınsha xalıqaralıq ekspert Ulıǵbek Kamoliddinov.
Chjeenchjou bazarın rawajlandırıw orayınıń direktorı Lyu Kuychjidiń sózlerine bola, Xenan provinciyasında jaylasqan Chjenchjou Qıtaydıń tiykarǵı ekonomikalıq hám transport oraylarınan biri bolıp tabıladı.
– Bul qala bay tariyxqa iye hám Qıtay civilizaciyasınıń besigi bolıp tabıladı. 13 millionnan aslam xalıq hám jalpı ishki ónimi 1,45 trillion yuannan asatuǵın Chjenchjou iri sawda hám investiciyalıq oray sıpatında jedel rawajlanbaqta. Qolaylı biznes ortalıǵı hám BYD, SAIC hám Ant Group sıyaqlı xalıqaralıq gigantlardıń bar ekeni qalanı birge islesiw ushın tartımlı etedi. Tashkent qalasında biznes-forumnıń ótkeriliwi Qıtay hám Ózbekstan arasındaǵı ekonomikalıq baylanıslardı bekkemlewde áhmiyetli basqısh boldı. Kelesi jıllarda investiciya kirgiziwdiń kólemi, ózbek ónimleriniń Qıtay bazarına eksportı jáne de artıwı kútilmekte, – dedi ol.
Biznes-forum juwmaǵında óz-ara birge islesiwdi jolǵa qoyıw boyınsha eki tárepleme shártnamalarǵa qol qoyıldı.

Nasiba Ziyodullaeva,
ÓzAnıń xabarshısı