Shomanay rayonı Mádeniyat bóliminde “2025-jılda respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw ilajları haqqında”ǵı qarardıń orınlanıwın támiyinlew maqsetinde “Hayal-qızlarǵa itibar – baxıtlı shańaraq gilti” atamasında hayal-qızlar forumı ótkerildi.

Forumǵa sektor baslıqları, Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı hám turizm jámiyetlik birlespeleri máseleleri komitetiniń bas qánigesi B.Ayımbetova, Shańaraq hám hayal-qızlar komitetiniń bas qánigesi M.Turdımuratova, Ishki isler ministrliginiń jámiyetlik qáwipsizlik profilaktikası basqarmasınıń baslıǵı podpolkovnik R.Eshimbetov, JQX HPB baslıǵınıń orınbasarı podpolkovnik X.Reymkulova hám qala hám rayonlardan kelgen ishki isler bóliminiń hayal-qızlar máseleleri boyınsha orınbasarları qatnastı.
Forumdı rayon hákiminiń orınbasarı, Shańaraq hám hayal-qızlar bóliminiń baslıǵı T.Qallıqılicheva kiris sóz benen ashtı.
Forumda hayal-qızlar arasında júz berip atırǵan jınayatshılıqtıń sebeplerin úyreniw, bunday jınayatlardıń aldın alıw, hayal-qızlardıń mashqalaların úyreniw máseleleri dodalandı.
Ilaj dawamında hayal-qızlarǵa qaratılǵan zorlıq hám jınayatshılıqtıń aldın alıw baǵdarındaǵı nızam hújjetleri tuwralı maǵlıwmatlar berilip, hayal-qızlardıń huqıqların qorǵaw boyınsha másláhátler berildi.
Forum qatnasıwshıları hayal-qızlarǵa qaratılǵan zorlıq hám jınayatshılıqtıń aldın alıw boyınsha óz pikirlerin bildirip, usınıslar berdi.
Ilaj hayal-qızlardıń huqıqları menen máplerin qorǵaw, olardıń jámiyettegi ornın bekkemlewge qaratılǵan áhmiyetli qádem boldı.

Qaraqalpaqstan xabar agentligi.