Shımbay rayonındaǵı sport mektebinde 2013-2014-jıllarda tuwılǵan jas óspirimler arasında sporttıń milliy gúres túri boyınsha «Prokuror kubogi» bolıp ótti.

Jarısqa shımbaylı jaslardan tısqarı, qońsılas Qaraózek, Taxtakópir, Kegeyli hám Bozataw rayonlarınan palwanlar qatnastı.
Qızǵın bellesiwlerge bay bolǵan jarıs juwmaǵında, er balalar arasında 30 kg salmaqta bozatawlı Azizbek Dáryabaev, 33-36-40-44 kg salmaqta shımbaylı sportshılardan Bawırjan Ámetov, Xoja Sattarberdiev, Baǵdáwlet Amangeldiev, Erlan Sarqıtbaevlar barlıq qarsılasların jeńip shıǵıp, kubok iyesine aylandı. Al, 48 hám +48 kg salmaqta taxtakópirli Jasulan Qarasaev, qaraózekli Asılxan Orazbaevlar birinshi orındı jeńip aldı.
Qızlar arasında bolsa, 30-36-44 hám +48 kg salmaqta shımbaylı jaslardan Uljan Qarjawbaeva, Aynura Pirniyazova, Zulfiya Abdullaeva hám Ulbosın Turdıbaevalar birinshi orındı iyelewge eristi.
40-48 kg salmaqta taxtakópirli Gúlistan Jaqsılıqova hám qaraózekli Mehriy Erxanovalarǵa teń keletuǵın qarsılas tabılmadı.
Jarıs sońında jeńimpazlar hám sıylı orın iyeleri shólkemlestiriwshiler tárepinen tayarlanǵan diplom, medal, kubok hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentliginiń sholıwshısı.