Ózbekstan “Milliy tiklanish” demokratiyalıq partiyası Qaraqalpaqstan Respublikası Keńesiniń 2025-jılǵa belgilengen rejesinde Qaraqalpaqstan Respublikasındaǵı balalar muzıka hám kórkem-óner mektepleriniń jumısların úyreniw, bilimlendiriwdiń sapası boyınsha analitikalıq maǵlıwmatlar tayarlaw hám jámiyetlik tıńlawlardı shólkemlestiriw belgilengen.

Sonnan kelip shıqqan halda partiyanıń Qaraqalpaqstan Respublikası Keńesiniń baslıǵı, Joqarǵı Keńes deputatı Tájibay Romanov, Xalıq deputatları Nókis qalalıq Keńesiniń deputatı Endirbay Abdullaev hám taraw qánigelerinen ibarat jumısshı topar Nókis qalasındaǵı 12-sanlı balalar muzıka hám kórkem-óner mektebinde boldı.
Tiyisli sorawnama tiykarında ótkerilgen úyreniw dawamında muzıka mektebi imaratınıń jaǵdayı, materiallıq-texnikalıq bazası, mektepte bilim berip atırǵan pedagoglardıń qánigeligi durıs tańlanǵanlıǵı, oqıw procesinde paydalanılıp atırǵan sabaqlıqlar hám basqa da máseleler boyınsha maǵlıwmatlar alındı hám jumısshı topar aǵzaları tárepinen talqılanbaqta.
Sonday-aq, jumısshı topar aǵzaları usı kúni Nókis qalasındaǵı, 22 hám 1-sanlı balalar muzıka hám kórkem óner mekteplerine de barıp, mekteplerdiń jumısı menen jaqınnan tanıstı hám sorawnama tiykarında úyreniw jumısların alıp bardı.
Úyreniw jumısları 24-26-fevral kúnleri Nókis qalası hám barlıq rayonlarda ótkerilip, anıqlanǵan kemshilikler hám mashqalalar jumısshı topar aǵzaları tárepinen talqılanıp, juwmaqlawshı maǵlıwmatlar tayarlanıp, ámelge asırılıwı zárúr bolǵan ilajlar belgilep alındı.

Qaraqalpaqstan xabar agentligi.