Mektepke shekemgi hám mektep bilimlendiriwi ministrligi mobil qánigelik arttırıw xızmetleri negizinde shólkemlestirilgen avtobuslardı aymaqlarǵa tarqatıw máresimi bolıp ótti.

Onda ministrlik juwapkerleri hám ǴXQ xızmetkerleri qatnastı.
Ózbekstan Respublikası Prezidentiniń 2024-jıl 30-sentyabrdegi tiyisli pármanına muwapıq, usı jıldıń 1-martınan baslap tájiriybe-sınaq túrinde respublikanıń uzaq hám shetki aymaqlarında jaylasqan mektepke shekemgi bilimlendiriw shólkemleri pedagog kadrları ushın mobil qánigelik arttırıw xızmetlerin engiziw belgilengen.
Mektepke shekemgi hám mektep bilimlendiriwi ministrligi málimleme xızmetiniń maǵlıwmatlarına bola, tájiriybe sınaq túrinde Qaraqalpaqstan Respublikası, Qashqadárya, Nawayı hám Samarqand wálayatlarında mobil qánigelik arttırıw xızmetleri jolǵa qoyılmaqta.
Bul mobil qánigelik arttırıw xızmetleri 4 auditoriya kórinisinde qayta úskenelengen avtobuslar negizinde shólkemlestiriledi. Avtobuslar bir waqıttıń ózinde 14 pedagogqa shınıǵıwlar ótiwge mólsherlengen oqıw orınları, 10 NR markalı noutbuk, bir 65dyumlıq interaktiv monitor, jazıw doskası, 1 internet tarqatıwshı qurılma (WI FI router) menen qayta úskenelengen. Bul avtobuslardan uzaq hám shetki aymaqlarda jaylasqan mámleketlik hám mámleketlik emes mektepke shekemgi bilimlendiriw shólkemleri pedagog kadrları ushın mobil qánigelik arttırıw xızmetlerin kórsetiw, yaǵnıy úzliksiz kásiplik rawajlandırıw («Metodikalıq sheberlik kúni» hám «Metodikalıq sheberlik saatı») ilajların tiyisli aymaqlarǵa barǵan halda trening, seminar hám basqa da túrlerde shólkemlestiriw maqsetinde paydalanıladı.
Pedagoglarǵa jasaw hám jumıs ornınan uzaqqa ketpegen halda úzliksiz kásiplik rawajlanıw, bilimlerin jańalap barıw arqalı mektepke shekemgi bilimlendiriw sapasın arttırıw imkaniyatları jaratıladı. Avtobuslar treningler, seminarlar hám ámeliy shınıǵıwlar ótkeriw ushın zárúr qurallar menen úskenelengen.

N.Usmonova, ÓzA