Qaraqalpaqstan Respublikası Ádillik ministrliginde 2024-jılı dawamında ministrlik tárepinen ámelge asırılǵan jumıslarǵa baǵıshlanǵan baspasóz konferenciyası bolıp ótti.

Konferenciyaǵa Ministrlik basshıları, juwapker xızmetkerleri hám ǵalaba xabar qurallarınıń wákilleri qatnastı.
Ilajda Qaraqalpaqstan Respublikası Ádillik ministriniń birinshi orınbasarı Amangeldi Prenov 2024-jıl dawamında ministrlik tárepinen ámelge asırılǵan jumıslar, sonıń ishinde, jaslar menen birge islesiw baǵdarında islengen isler haqqında keń túrde aytıp berdi.
-Ministrlik hám rayon (qala)lardaǵı ádillik bólimlerine fizikalıq hám yuridikalıq táreplerden 12 765 múrájatlar kelip tústi,-deydi óz shıǵıp sóylewinde A.Prenov.-Bul boyınsha xızmetkerlerimiz tárepinen júrgizilgen úyreniw jumısları nátiyjesinde, 7 546 múrájat (59%) qanaatlandırılıp, múrájatshılardıń huqıqları tiklendi. Atap aytqanda, sudlarǵa jámi summası 11 mlrd 942 mln sumnan artıq 1 363 dana dawa arzaları kirgizilip, puqaralardıń huqıqları sud tárepinen tikleniwine erisildi. Anıqlanǵan nızambuzılıwshılıq jaǵdayları hám olardı saplastırıw tarawında ministrlik tárepinen mámleketlik uyımlar hám shólkemlerde nızamshılıqtıń durıs tártipke salınıwı ústinen turaqlı ráwishte monitoring alıp barılmaqta.
Usınıń nátiyjesinde, 2024-jıl dawamında mámleketlik uyımlar hám shólkemler tárepinen 63 257 jaǵdayda nızam buzılıwına jol qoyılǵanlıǵı anıqlandı. Bul anıqlanǵan nızam buzılıw jaǵdayların saplastırıw boyınsha 1064 usınıs, 53 eskertiwler kirgizildi. 828 mámleketlik uyım hám shólkemlerde úyreniwler ótkerilip, mámleketlik uyımlar hám shólkemlerdiń lawazımlı hám juwapker xızmetkerlerinen 884 shaxs hákimshilik juwapkershilikke tartıldı. Sudlarǵa kirgizilgen usınıslar tiykarında puqaralarımızdıń 45 mlrd 384 mln swm qarjıları qaytarıldı hám tólep berildi.
Ilajda jurnalistler tárepinen ministrlik basshılarına búgingi kúni keń jámiyetshilikti qızıqtırıp júrgen másleler boyınsha sorawlar berilip, olarǵa juwaplar aldı.

Adilbay Orazov,
Qaraqalpaqstan xabar agentliginiń sholıwshısı.