Qarar hám onıń orınlanıwı

Ózbekstan Respublikası Ministrler Kabinetiniń «Isbilermenlik subyektlerin óz qálewi boyınsha saplastırıw hám olardıń jumısların toqtatıw tártibi hám qarjı-xojalıq jumısların ámelge asırmay atırǵan isbilermenlik subyektlerin mámleket reestrinen shıǵarıw tártibi haqqında»ǵı qaǵıydalardı tastıyıqlaw haqqında»ǵı qararında kórsetilgen wazıypalardı ámelge asırıw belgilengen ministrlikler hám mákemeler arasında Mámleketlik xızmetlerdi kórsetiw orayları da bar.
– Isbilermenlik subyektlerin mámleketlik diziminen ótkeriw hám esapqa qoyıwdıń avtomatlastırılǵan sisteması isbilermenlik subyektlerin mámleketlik diziminen ótkeriwdi, sonıń menen birge, dizimnen ótkeriwshi uyım hám wákilligi bar uyımlardıń baylanıs kanalları arqalı elektron málimleme almasıwın támiyinlew sisteması esaplanadı,-deydi Nókis qalalıq Ádillik bólimi Mámleketlik xızmetler orayınıń bas qánigesi M.Turakbaev.
Nókis qalalıq Ádillik bólimi Mámleketlik xızmetler orayında da mámleketlik xızmetlerge bolǵan talap artıp barmaqta. Orayda kúndelikli turmısta zárúr bolǵan xızmetlerden artıqsha áweregershiliksiz, turaqlı jasaw ornı qay jerde bolıwına qaramastan puqaralarımız eksterritorial principinde paydalanbaqta.
Fizikalıq hám yuridikalıq táreplerge nátiyjeli, professional hám sapalı xızmetler kórsetiw tiykarǵı wazıypamız etip belgilengenligin atap ótiw kerek. Kórsetilip atırǵan xızmetlerge itibar qaratatuǵın bolsaq, bıyılǵı jıldıń basınan Nókis qalası ádillik bólimi mámleketlik xızmetler orayı tárepinen yuridikalıq hám fizikalıq táreplerge 26409 mámleketlik xızmetler kórsetildi. Búgingi kúnde tek oray arqalı ǵana emes, al oraydan alısta jaylasqan orınlarǵa shıqqan halda da kóshpeli mámleketlik xızmetler kórsetilip kelinbekte. Orayǵa keliw imkaniyatı bolmaǵan puqaralarımızǵa kóshpeli tártipte 497 mámleketlik xızmetler kórsetildi.
Házirgi waqıtta usı qararda kórsetilgen Mámleketlik xızmetlerge belgilengen wazıypalarǵa muwapıq ilajlar ámelge asırılmaqta.
Atap aytqanda, Nókis qalasındaǵı Qutlı qonıs MPJ aymaǵında jaylasqan «IBRAGIMOFF CO» juwapkershiligi sheklengen jámiyetin jumıs kóleminiń bolmawı sebepli ıqtıyarıy túrde sapalastırıw boyınsha qarar shıǵarılıp, saplastırıw múddeti 6 ay etip belgilenip tiyisli jumıslar ámelge asırılmaqta. Tiyisli qararǵa muwapıq, kárxananı saplastırıwǵa baylanıslı bolǵan múrájatlerdi qabıl etiw ornı hám múddeti belgilenip, nızam hújjetlerinde belgilengen tártipte kárxana xızmetkerleri menen miynetke baylanıslı huqıqıy qatnasıqlardı toqtatıw ilajlarınıń kóriliwi, kárxananıń debitorlıq qarızların alıw, kreditorlardı anıqlaw hám kommerciyalıq shólkemniń saplastırılıwı haqqında jazba túrde xabardar etiw ilajların kóriw tapsırıldı. Saplastırıw balansın tastıyıqlaw hám salıq xızmeti uyımına tapsırıw jáne basqa da tiyisli ilajlar belgilendi,
Nókis qalalıq Ádillik bólimi Mámleketlik xızmetler orayı tárepinen bul baǵdardaǵı jumıslar dawam etpekte.

Á.Jiyemuratov,
Qaraqalpaqstan xabar agentligi