Ózbekstan Respublikası Prezidenti Administraciyasınıń 2024-jıl 3-dekabr kúngi tapsırma xatına muwapıq, Ózbekstan Respublikası Joqarǵı sudı basshılıǵında rayon hám qala hákimleri menen birgelikte aymaqtı sociallıq-ekonomikalıq rawajlandırıw boyınsha máseleler boyınsha usı jıldıń 15 hám 17-yanvar kúnleri ashıq sáwbetlesiw ótkerildi.
Usı tapsırmanıń orınlanıwın dawam ettirgen halda Ózbekstan Respublikası Joqarǵı sudınıń tapsırma xatına tiykarlanıp orınlardaǵı rayon hám qalalıq kadastr hám qurılıs bólimi wákilleri menen birgelikte búgingi kúnde áhmiyetli bolǵan ózbasımshalıq penen qurılǵan qurılıslar hám mámleket hám jámiyet mútájlikleri ushın jer uchastkalarınıń alıp qoyılıwı múnásibeti menen puqaralarǵa hám yuridikalıq táreplerge jetkerilgen zıyanlardı qaplaw, jer uchastkasınan paydalanıw huqıqına baylanıslı máseleler boyınsha seminar májilisin ótkeriw belgilengen.
Sol tiykarda Qaraqalpaqstan Respublikası hákimshilik sudı tárepinen Qaraqalpaqstan Respublikası Qurılıs hám turaq jay kommunallıq xojalıǵı ministrligi hám onıń rayon (qala)lıq bólimleri, Mámleketlik kadastrlar palatası Qaraqalpaqstan Respublikası basqarması hám onıń rayon (qala)lıq bólimleri wákilleri menen birgelikte seminar májilisi shólkemlestirildi.
Seminarda Qaraqalpaqstan Respublikası hákimshilik sudınıń sudyası R.Xudayberganova 2024-jıl dawamında Qaraqalpaqstan Respublikası hákimshilik sudları tárepinen qurılıs bólimleriniń hákimshilik hújjetin haqıyqıy emes, olardıń lawazımlı shaxslarınıń háreketlerin (háreketsizligin) nızamǵa muwapıq emes dep tabıw haqqındaǵı isler boyınsha mápdar shaxslar arzalarınıń qanaatlandırılıwına tiykar bolǵan jaǵdaylar haqqında aytıp ótti.
Sonıń menen birge, qurılıs bólimleri tárepinen jol qoyılǵan qáte-kemshilikler hám ámeliyatta ushırasıp atırǵan mashqalalar haqqındaǵı máseleler dodalandı.
Sonday-aq, seminarda kún tártibindegi keyingi másele-Mámleketlik kadastrlar palatası Qaraqalpaqstan Respublikası basqarması hám onıń aymaqlıq bólimleri tárepinen mámleketlik dizimnen ótkeriwden bas tartıw hám belgilengen múddetinde dizimnen ótkeriwden bas tartıw haqqındaǵı isler boyınsha júzege kelip atırǵan mashqalalar hám olardıń sheshimleri haqqında Qaraqalpaqstan Respublikası hákimshilik sudınıń sudyası G.Baynazarovanıń bayanatı tıńlandı.
Seminar májilisi dawamında Ózbekstan Respublikası Joqarǵı sudı Plenumınıń 2023-jıl 20-noyabr kúngi «Sudlarda jerge baylanıslı tartıslardı kóriwde nızamshılıq hújjetleri normaların qollanıwdıń ayırım máseleleri haqqında»ǵı 28-sanlı qararınıń mazmun-mánisi haqqında Qaraqalpaqstan Respublikası sudınıń sudyası Z.Babadjanovanıń hámde rayon (qala) hákimlikleriniń jer uchastkaların ijaraǵa beriw shártnamaların biykarlaw hám jer uchastkaların alıp qoyıw haqqındaǵı dawaları boyınsha islerdiń ekonomikalıq sudlar tárepinen kórip shıǵılıwı menen baylanıslı sud ámeliyatı boyınsha Qaraqalpaqstan Respublikası sudınıń sudyası U.Sabirovtıń bayanatları tıńlandı.
Seminar dawamında rayon (qala)lıq kadastr hám qurılıs bólimleri wákilleriniń ózlerin qızıqtırǵan sorawlarına sudyalar tárepinen juwaplar berildi. Keleshekte bunday túrdegi seminar májilislerin turaqlı túrde ótkerip, júzege kelip atırǵan mashqalalar tuwralı ámeldegi nızamshılıqqa usınıslar kirgiziw boyınsha kelisip alındı.

Qaraqalpaqstan xabar agentligi