«Xududgaz Qaraqalpaqstan» gaz támiynatı filialında baslanǵısh kásiplik awkam komitetiniń gezektegi májilisi bolıp ótti.
Onda komitettiń bes jıl dawamında ámelge asırǵan jumısları boyınsha esabatı tıńlandı.

-Sońǵı bes jıl ishinde «Xududgaz Qaraqalpaqstan» gaz támiynatı filialı baslanǵısh kásiplik awqamı komiteti tárepinen jámáát penen bekkem baylanıs ornatıw, taraw qánigeleriniń salamatlıǵın hám sociallıq qorǵalıwın támiyinlew hám mádeniy aǵartıwshılıq ǵalabalıq sport jarısları ilajların keńeytiw baǵdarlarında unamlı nátiyjelerge erisildi,-deydi filial xızmetkeri Idiris Erjanov.
Esabatta atap ótilgenindey, usı ótken dáwir ishinde taraw xızmetkerlerinen kelip túsken múrájatlerdiń hámmesi tolıq qanaatlandırılǵan. Taraw xızmetkerleriniń salamatlıǵın bekkemlew maqsetinde, sanatoriya hám dem alıw orınlarına, sonday-aq, olardıń balaların sawalandırıw dem alıw oraylarına jiberiw, járdemge mútáj qánigelerdiń shańaraqlarına materiallıq járdem beriw ilajları ámelge asırılǵan.
Májilis dawamında kásiplik awqam komitetiniń alıp barǵan jumısları bahalanıp, kún tártibindegi barlıq máseleler kórip shıǵıldı hám kásiplik awkam komiteti baslıǵı lawazımına Quwatbay Qudaybergenov saylandı.
Sonday-aq, májiliste aldaǵı waqıtlarda filialdıń Baslanǵısh kásiplik awqam komitetiniń esap beriw-saylaw konferenciyasına qatnasıw ushın barlıq qala hám rayonlıq gaz támiynatı bólimlerinen delegatlar saylandı.

Qaraqalpaqstan xabar agentligi