Sońǵı jılları elimizde milliy úrp-ádet hám salt-dástúrlerimizdi qayta tiklew hám onı keleshek áwladlarımızǵa sap halda jetkeriw boyınsha kóplegen unamlı isler ámelge asırılmaqta.
Ásirese, respublikamızda turizmniń bir túri esaplanǵan gastronomiyalıq turizmdi rawajlandırıw boyınsha «Balıqtan 99 túrli taǵam» hám «Júweri gúrtik» festivallarınıń ótkeriliwi milliyligimizdi qayta tiklewge qaratılıp atırǵan itibardıń ayqın kórinisi desek boladı.
Búgin Nókis qalasınıń Taslaq elatı aymaǵında jaylasqan «Qaraqalpaq awılı» etno-turistlik ornında «Júweri gúrtik kúni» bayramı sıpatında keń túrde belgilendi.
Onda bul milliy taǵamdı tayarlaw boyınsha aspazlar tańlawı, Qaraqalpaq milliy folklor atqarıwshılarınıń koncert baǵdarlaması, milliy sport oyınları, ónermentler kórgizbeleri hám basqa da mádeniy ilajlar ótkerildi.
Ilajdıń ashılıw saltanatında Ruwxıylıq hám aǵartıwshılıq orayı Qaraqalpaqstan Respublikası basqarması baslıǵı T.Atamuratov, «Nuraniy» qorı Qaraqalpaqstan Respublikası bóliminiń baslıǵı T.Abdijabbarov, Qaraqalpaqstan Aspazları birlespesi baslıǵı G.Yuldashev hám basqalar shıǵıp sóylep, Prezidentimiz basshılıǵında xalqımızdıń milliy qádiriyatların qayta tiklewge qaratılıp atırǵan itibar hám ǵamqorlıqtı maqtanısh penen tilge aldı. Ásirese, sońǵı jılları Qaraqalpaqstanda turizmdi rawajlandırıwǵa jaratılıp atırǵan keń imkaniyat hám qolaylı sharayatlarǵa toqtaldı. Sonıń ishinde, gastranomiyalıq turizmniń bir kórinisi esaplanǵan, qaraqalpaq xalqınıń milliy taǵamlarınıń biri bolǵan júweri gúrtiktiń ózine tán ózgeshelikleri, adam densawlıǵına paydalı tárepleri hám xalqımızdıń turmısında tutqan ornı haqqında ilaj qatnasıwshılarına keń túrde aytıp berdi.
Sáne múnásibeti menen ótkerilgen ilajda aspazlar tańlawı, ónermentler hám xudojnikler kórgizbesi, milliy sport oyınları shólkemlestirilip, olar tájiriybeli tóreshiler quramı tárepinen bahalanıp barıldı.
Kóterińki ruwxta ótkerilgen aspazlar tańlawı juwmaǵında, «Eń jaqsı aspaz» nominaciyası boyınsha Nókis qalasındaǵı 24-sanlı mektepke shekemgi bilimlendiriw shólkeminiń bas aspazı Arıwxan Saparova, «Eń jaqsı bezetilgen júweri gúrtik» nominaciyasında Madina Dáwletmuratova hám «Eń jas aspaz» nominaciyası boyınsha «Admiral» restoranınıń aspazı Bahadır Baymuratovlar jeńip alıwǵa miyasar boldı.
Ilaj sońında jeńimpazlar shólkemlestiriwshiler tárepinen tayarlanǵan diplom hám estelik sawǵalar menen sıylıqlandı.
Ilajǵa Qaraqalpaqstan Respublikası Joqarǵı Keńesiniń komitet baslıǵı M.Atamuratov, Qaraqalpaqstan Respublikası Ministrler Keńesi Baslıǵınıń orınbasarı R.Zarikeevler qatnastı.

Adilbay Orazov,
Qaraqalpaqstan xabar agentliginiń sholıwshısı.