Xalqımızda “Sawaplı isti hár kim, hár jerde islew kerek” degen dana naqıl bar. Qayırlı isler islew, mútájlerge járdem qolın sozıw – insannıń eń joqarı pazıyletlerinen biri bolıp esaplanadı. Solay eken, biz qanday lawazımda bolmayıq, átiraptaǵılarǵa imkanı bolǵanınsha járdem beriwge háreket etiwimiz kerek.

Qaraqalpaqstan Respublikası Joqarǵı Keńesiniń deputatı Alisher Djumanazarov mine usınday qayırqomlıqqa jáne bir márte qol urdı. Onıń baslaması menen Nókis rayonı “Úlgili mákan” MPJda jaylasqan 19-sanlı ulıwma bilim beriw mektebiniń kóklemzar maydanındaǵı nasos suwǵarıw sistemasınan xazirgi uakıtta hesh qanday qıyınshılıqlarsız suw shıǵarılmaqta.

Deputattıń usı máhálledegi saylawshılar menen ótkergen ushırasıwında mektep direktorınıń orınbasarı Azat Tashpolatov bilimlendiriw ornında aymaqtı kóklemzarlastırıw hám egilgen terek nállerin suwǵarıw ushın suw dáregi joq ekenligi sebepli, xalıq wákilinen mektepke artezian qudıǵı qazdırıp, suw nasosın alıp beriwge ámeliy járdem soraǵan edi.
Múrájat 24 saat ishinde kórip shıǵılıp, deputattıń baslaması menen erteńine unamlı sheshildi. Erte tańnan barlıq kerekli ásbap-úskeneler alıp kelinip, burǵılaw jumısları baslandı. Kúnniń aqırına kelip jer astı suw nasosı ornatılıp, házirde jasıl maydanǵa hesh qanday mashqalasız suw shıǵıp atır.

Usı múnásibet penen, mektep administraciyası deputatqa óz minnetdarshılıǵın bildirgen halda Isbilermenler háreketi Ózbekstan Liberal-demokratiyalıq partiyasınıń keleshektegi jumısına hám qayırqomlıq jumıslarına tabıslar tiledi.

Sonıń menen birge, deputatqa “Uzınkól” kóshesi turǵınları usı aymaqtaǵı taslandı, qarawsız jatırǵan 1 gektarǵa shamalas maydandı kóklemzarlastırıw hám terek nállerin egiw ushın jer maydanın tegislewde ámeliy járdem beriwin aytıp múrájat etken edi.

Deputat Alisher Djumanazarov óz qáwenderligi esabınan usı aymaqtı kóklemzarlastırıw hám terek nállerin egiw ushın jer maydanın tegislewde ámeliy járdem kórsetti.

– Ótken jılǵı saylawlarda ÓzLiDeP talabanlarına dawıs bergen edim. Partiyadan kórsetilgen talaban Alisher Djumanazarov turaqlı túrde xalıq penen sóylesiwge, olardıń halınan úzliksiz xabar alıwǵa, mashqalalarımızdı sheshiwge wáde bergen edi. “Uáde emes – nátiyje, erteń emes – búgin” súreni menen shıqqan edi. Búgin olar óz wádesiniń ústinen shıǵıp, ápiwayı xalıq arasında júrip, olardıń mashqalaların sheshpekte. Mektebimizge biypul jer astı suw nasosın múrájat etkenimizdiń ertesi kúni sheship berilgeni mektebimizdiń muǵallimleri hám oqıwshıları tárepinen tán alınıp, partiyaǵa bolǵan isenimimiz artpaqta. ÓzLiDeP partiyası hám deputatımızǵa raxmet aytamız,-deydi Nokis rayonı 19-sanlı mektep direktorının orınbasarı Azat Tashpolatov.

Karkalpakstan xabar agentligi