Ózbekstan Respublikası Prezidentiniń 2021-jıl 29-noyabrdegi «Ózbekstan Respublikası jámiyetlik qáwipsizlik koncepciyasın tastıyıqlaw hám onı ámelge asırıw ilajları haqqında»ǵı pármanı hám 2022-jıl 3-fevraldaǵı «Internet tarmaǵında júz berip atırǵan huqıqbuzarlıqlardıń erte aldın alıwǵa baylanıslı ilajlar haqqında»ǵı qararı tiykarında elimizde kóplegen ilajlar ámelge asırılmaqta.

Atap aytqanda, 2023-2024-jılları respublikamız boylap ótkerilgen «Kibermádeniyattı joqarılatıw aylıǵı» sheńberinde úgit-násiyat jumısların júrgiziw ushın jergilikli byudjetten 380 mln sum qarjı ajıratılıp, usı tiykarda keń jámiyetshilik arasında úgit-násiyatlaw ilajları ótkerildi.
Degen menen, respublikamızda internet hám zamanagóy málimleme texnologiyalarınan nadurıs paydalanıw hár qıylı kiberjınayatlar hám huqıqbuzarlıqlar sanınıń kóbeyiwine sebep bolmaqta.
Berdaq atındaǵı Qaraqalpaq mámleketlik universitetiniń Sanaat texnologiyası fakultetinde studentler hám professor-oqıtıwshılardıń huqıqıy bilimlerin arttırıw, kiberqáwipsizlik boyınsha xabardarlıǵın kúsheytiw maqsetinde úgit-násiyatlaw ilajı shólkemlestirildi.
Onda universitettiń profilaktika inspektorı I.Erejepov kiberjınayashılıqtıń qáwip-qáterleri, onıń túrleri, aldın alıw ilajları hám málimleme qáwipsizligin támiyinlew jolları haqqında keń túrde maǵlıwmatlar berdi. Ilajda studentler tárepinen bayanatshıǵa sorawlar berip, olarǵa juwaplar aldı.

Adilbay Orazov,
Qaraqalpaqstan xabar agentliginiń sholıwshısı.