Ózbekstan Sawda-sanaat palatasında BAÁ Sharja ámirliginde jaylasqan «Al-Qosimiya» universiteti rektorı Avvad Al-Xalaf penen sóylesiw bolıp ótti. Ushırasıwda tárepler IT, marketing hám málimleme texnologiyaları tarawında izbe-iz birge islesiw ornatıw máselesin dodaladı.

Palata baslıǵınıń birinshi orınbasarı Davron Qurbanov keyingi jıllarda respublikamızda ámelge asırılıp atırǵan keń kólemli reformalar, sonıń ishinde, isbilermenlerge qolaylı sharayat jaratıw, sırt el investiciyaların tartıwǵa qaratılǵan baslamalar haqqında tolıq maǵlıwmat berdi.
Óz gezeginde, Avvad Al-Xalaf elimizdegi qábiletli studentlerdi, isbilermenlerdi qollap-quwatlawǵa qızıǵıwshılıq bildirip, bakalavriat hám magistratura ushın grant ajıratıw arqalı bilim alıw imkaniyatın keńeytiw niyetin bildirdi.
Sonday-aq, birgelikte bilmlendiriw orayın shólkemlestiriw teması da kóterildi. Bul kompleks jaslarımız – keleshek isbilermenleriniń bilimin, mamanlıǵın arttırıwǵa xızmet etetuǵını atap ótildi.

Sevinch Zoirova, ÓzA