Usı kúnlerde Avstriyanıń Vena qalasında Atom energiyası xalıqaralıq agentligi (MAGATЕ) tárepinen «Radioaktiv shıǵındılar menen islesiw hám yadrolıq obyektlerdi paydalanıwdan shıǵarıw haqqındaǵı reje joybarın islep shıǵıw» atamasında regionallıq ilaj ótkerilmekte.

Onda Sanaat, radiaciya hám yadro qáwipsizligi komiteti Radiaciya hám yadro qáwipsizligi departamentiniń xızmetkeri Otabek Еshmurodov qatnaspaqta.
Bul ilajdan gózlengen maqset, MAGATЕge aǵza mámleketlerdiń radioaktiv shıǵındılar, paydalanıp bolınǵan jabıq ionlastırıwshı nurlanıw dereklerin qadaǵalaw hám yadrolıq obyektlerdi xalıqaralıq qáwipsizlik standartlarına muwapıq paydalanıwdan shıǵarıw boyınsha normativlik hújjetler islep shıǵıwdı qollap-quwatlawǵa qaratılǵanın atap ótiw kerek.
28-fevralǵa shekem óz jumısın dawam ettiretuǵın usı ilajda bir qatar máseleler boyınsha dodalawlar shólkemlestirilmekte.
Komitet málimleme xızmetiniń xabar beriwinshe, 17-21-fevral kúnleri Vena qalasında MAGATЕ tárepinen shólkemlestirilgen «Radioaktiv shıǵındılar hám paydalanılıp bolınǵan yadro janılǵısı menen islesiw hám kishi modulli reaktorlardı (KMR) paydalanıwdan shıǵarıw» temasındaǵı texnikalıq májilis te bolıp ótti. Oǵan usı shólkemniń Radiaciya hám yadro qáwipsizligi departamentiniń xızmetkeri Jalil Yusupov ekpert sıpatında qatnastı.
Májiliste MAGATЕge aǵza mámleketlerdiń radioaktiv shıǵındılar hám paydalanılıp bolınǵan yadro janılǵısı menen islesiw tájiriybesin úyreniwge itibar qaratıldı. Sonday-aq, bul processtegi texnikalıq, qáwipsizlik hám normativlik táreplerin dodalaw, KMRlardı obyekt jumısınıń barlıq basqıshlarında paydalanıwdan shıǵarıw máseleleri talqılandı.
Komitet málimleme xızmetiniń bildiriwinshe, ilaj dawamında radioaktiv shıǵındılar menen islesiwde qáwipsizlikti támiyinlew, KMRlardı ornalastırıw ushın infrastrukturalıq zárúrliklerdi qáliplestiriw, málimleme almasıw ushın xalıqaralıq platforma jaratıw jáne KMR dizaynerleri hám tiyisli shólkemler arasında birge islesiwdi rawajlandırıw máseleleri de kórip shıǵıldı.

N.Ziyodullaeva,
ÓzAnıń xabarshısı