Shomanay rayonında Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı M.Axmedova, rayon hákiminiń orınbasarı, Shańaraq hám hayal-qızlar bóliminiń baslıǵı T.Qallıqılicheva, Beruniy hám Taqıyatas rayonlarınan kelgen isbilermen hayal-qızlar, awıl hám mákan puqaralar jıyınlarındaǵı hayal-qızlar belsendileriniń qatnasıwında “Sayxunabad tájiriybesi” mısalında kórgizbeli seminar ótkerildi.
Maqset – hayal-qızlar isbilermenligin rawajlandırıw.

Seminarda hayal-qızlar isbilermenligin qollap-quwatlawǵa baylanıslı qabıl etilgen arnawlı qararlar tiykarında, Nawrız, Aybúyir hám Monshaqlı mákan puqaralar jıyınlarındaǵı hayal-qızlardıń isbilermenlik jumıslarındaǵı tájiriybeleri kórsetildi.
Nawrız mákan puqaralar jıyını turǵını Bazargúl Bekbosınova óziniń qıytaq jerinde ıssıxanada jetistirilip atırǵan ónimleri hám zamarrıq jetistiriw boyınsha tájiriybesi menen ortaqlastı.
2024-jıl “Sheber qızdıń óneri” grant tańlawınıń jeńimpazı Gúlmira Jádigerova tigiwshilik cexın keńeytip, hayal-qızlardı biypul tigiwshilikke oqıtıp kelmekte. Ilajda Monshaqlı mákan puqaralar jıyınında “Ónerliniń qolı gúl” grant joybarınıń jeńimpazı Altınay Náwbetovanıń da qoy júninen tayarlanǵan ónimleri kórsetildi.
Seminarda hayal-qızlar isbilermenligin rawajlandırıwǵa qaratılǵan ámeliy tájiriybeler, nátiyjeli joybarlar hám grantlar haqqında maǵlıwmat berildi. Ilaj qatnasıwshıları ózleri ushın paydalı bolǵan jańa bilim hám ideyalar menen tanısıp, qızıqtırǵan sorawlarına juwap aldı.

Qaraqalpaqstan xabar agentligi.