2025-jıldıń 22-fevral kúni Tashkent qalasında Ózbekstan Respublikası Oliy Majlisi Senatınıń tórtinshi jalpı májilisi óz jumısın dawam ettirdi.
Onda Senat, húkimet aǵzaları, ministrlik hám uyımlardıń wákilleri, jergilikli Keńeslerdiń deputatları, Senat janındaǵı Jaslar parlamenti aǵzaları hám ǵalaba xabar qurallarınıń xızmetkerleri qatnastı.
Videokonferencbaylanıs túrinde ótkerilgen jalpı májilisti Ózbekstan Respublikası Oliy Majlisi Senatınıń Baslıǵı Tanzila Norboeva alıp bardı.
Jalpı májilis Senattıń YouTube tarmaǵındaǵı beti arqalı tikkeley sáwlelendirip barıldı.
Jalpı májilistiń úshinshi jumıs kúni senatorlar tárepinen dáslep «Ózbekstan Respublikası Húkimeti menen Qatar Mámleketi Húkimeti arasında eki tárepleme strategiyalıq sheriklik qatnasıqların ornatıw haqqındaǵı Kelisimdi (Tashkent qalası, 2024-jıl 15-aprel) ratifikaciyalaw haqqında»ǵı nızamdı kórip shıǵıwdan baslandı.
Atap ótilgenindey, bul eki Kelisimde mámleket arasında óz-ara paydalı siyasiy, sawda-ekonomikalıq hám mádeniy-gumanitarlıq tarawlardaǵı birge islesiw baylanısların rawajlandırıwǵa qaratılǵan tiykarǵı baslı baǵdarlar belgilenbekte.
Sonıń ishinde, Kelisimde kólemli maqsetlerdi gózlegen bilimlendiriw hám ilim, densawlıqtı saqlaw, mádeniyat hám mádeniy miyras, turizm, sport sıyaqlı áhmiyetli tarawlarda birge islesiwdi tereńlestiriw, sonday-aq, ekonomika, basqarıw, diplomatiya hám turizm tarawlarında kadrlar tayarlaw hám olardıń tájiriybesin arttırıw boyınsha tájiriybe almasıwǵa qaratılǵan birgeliktegi háreketlerdi muwapıqlastırıw názerde tutılmaqta.
Bunnan tısqarı, bul hújjette xalıqaralıq shártnamalarǵa muwapıq óz-ara paydalı sawda-ekonomikalıq birge islesiwdi keńeytiw, investiciyalardı tartıw hám qollap-quwatlaw hám jeke menshik sektorlardaǵı birgeliktegi kárxanalardı shólkemlestiriw boyınsha zárúr ilajlardı kóriw názerde tutılmaqta.
Hújjette xalıqaralıq terrorizm hám ekstremizmge, náshebentlik quralları, psixotrop elementler, qurallardıń nızamsız aylanısta bolıwına, shólkemlesken jınayatshılıqqa, adam sawdasına qarsı gúresiw hám olardı saplastırıw mexanizmleriniń nátiyjeliligin arttırıwǵa qaratılǵan háreketlerdi muwapıqlastırıw hám birlestiriw boyınsha anıq hám rejeli ilajlar belgilenbekte.
Senatorlardıń pikirinshe, Kelisimdi ratifikaciyalaw haqqındaǵı nızam Ózbekstan hám Qatar arasındaǵı kóp táreplemeli birge islesiw baylanısların jáne de bekkemlewge xızmet etedi.
Dodalaw sońında senatorlar tárepinen nızam maqullandı.
Bunnan soń «Qorshaǵan ortalıq penen baylanıslı bolǵan máseleler boyınsha qararlar qabıllaw procesinde jámiyetshiliktiń málimleme alıw imkaniyatı, qatnası hám ádil sudlawǵa erisiw imkaniyatı haqqındaǵı Konvenciyaǵa (Orxus, 1998-jıl 25-iyun) Ózbekstan Respublikasınıń qosılıwı haqqında»ǵı nızam dodalandı.
Bul Konvenciya insannıń salamatlıq ortalıqqa bolǵan huqıqların qorǵawǵa qaratılǵan áhmiyetli xalıqaralıq hújjet bolıp esaplanıp, ol tiyisli mámleketlik uyımlar, puqaralar hám jámiyetshilik arasında ekologiyalıq málimlemelerdi alıw hám olardan paydalanıwdı támiyinlewge qaratılǵan.
Atap ótilgenindey, xalıqaralıq statustaǵı hújjettiń tiykarǵı maqseti – ekologiya, qorshaǵan ortalıq hám puqaralardıń salamatlıǵına unamsız tásir kórsetiwi múmkin bolǵan qararlardı qabıllawda jámiyetshiliktiń qatnası menen baylanıslı óz-ara qatnasıqlardı tártipke salıw hám ádil sudlawǵa erisiwdi támiyinlewden ibarat.
Konvenciyada mámleketlik uyımlar hám shólkemler tárepinen keń jámiyetshilik sorawına bola hawa, atmosfera, suw hám topıraq sıyaqlı qorshaǵan ortalıq elementleriniń quramlıq bóleklerine baylanıslı zárúr maǵlıwmatlardı beriw, tarawdı rawajlandırıwǵa qaratılǵan baǵdarlama hám rejelerdi islep shıǵıwda jámiyetshiliktiń qatnasın támiyinlew belgilengen.

Senatorlar kórip shıqqan máselede Samarqand wálayatı Aqdárya rayonınan 243 gektar, Samarqand rayonınan 170 gektar, jámi 413 gektar jer maydanı Samarqand qalası quramına ótkeriliwi názerde tutılmaqta.
Nátiyjede ámeldegi 252 gektardan ibarat «Shirin» massiviniń aymaǵı keńeytilip, jámi 665 gektar maydandı quraydı.
Dodalawlar procesinde tastıyıqlanǵan master reje boyınsha aymaqta 180 mıń xalıqqa mólsherlengen jámi 60 mıń kvartiradan ibarat 254 kóp qabatlı turaq jay, 45 sociallıq taraw obyekti qurılatuǵını málim etildi.
Bul «Shirin» poslyolkasında dóretiwshilik joybarların ámelge asırıw múddetleri anıq rejelestirilgen hám qurılıs jumısları 3 basqıshta alıp barıladı.
Itibarlı táreplerinen biri sonda, «Shirin» zamanagóy isbilermenlik orayı tolıq qurılıwı nátiyjesinde hár qıylı tarawlarda 50 mıńǵa shamalas xalıq ushın jańa jumıs orınları jaratıladı.
Senatorlardıń tolıq pikirine bola, wálayattaǵı shegaralardıń ózgertiliwi Samarqand qalasınıń arxitekturalıq kórinisin jaqsılaw hám abadanlastırıw, sırt el hám jergilikli investorlar ushın tartımlılıǵın arttırıw, qalanıń turizm imkaniyatınan nátiyjeli paydalanıw, zamanagóy biznes, qarjı hám turistlik infrastrukturalardı jedel rawajlandırıwdı támiyinlew hám eń tiykarǵısı, xalıqtıń turmıs abadanlıǵın arttırıwǵa xızmet etedi.
Dodalaw sońında Senattıń tiyisli qararı qabıl etildi.
Bunnan tısqarı, senatorlar tárepinen Ózbekstan Respublikası Oliy Majlisi Senatı Kengashiniń qararları da tastıyıqlandı.
Jalpı májiliste jámiyetlik turmıstıń barlıq tarawlarınıń huqıqıy tiykarların bekkemlewge hám mámlekette ámelge asırılıp atırǵan keń kólemli reformalardıń nátiyjeliligin arttırıwǵa, xalıqaralıq birge islesiwdi rawajlandırıwǵa qaratılǵan 19 másele, sonıń ishinde, 17 nızam kórip shıǵıldı.
Usınıń menen Ózbekstan Respublikası Oliy Majlisi Senatınıń tórtinshi jalpı májilisi juwmaqlandı.

Ózbekstan Respublikası
Oliy Majlisi Senatı
Málimleme xızmeti