Usı jıldıń 17-22-fevral kúnleri Ándijan wálayatında basketbol boyınsha hayal-qızlar arasında Ózbekstan kubogi bolıp ótti.
Oǵan mámleketimizdiń barlıq aymaqlarınan basketbol komandaları qatnastı.
Sonıń ishinde, bul jarısqa jeńimpazlıqqa tiykarǵı dawagerlerden esaplanǵan respublikamızdıń qızlar komandası da qatnasıp, onda barlıq qarsılasların jeńip shıǵıwǵa miyasar boldı. Atap aytqanda, respublikamız komandası Nawayı, Namangan, Jizzaq, Ferǵana hám Tashkent wálayatınıń «AGMK» komandaları menen kúsh sınasıp, olardı jeńip shıǵıwǵa eristi hám Ózbekstan kubogi iyesine aylandı.
-Bunnan aldınǵı ótkerilgen Ózbekstan chempionatı hám kubogi jarıslarında sportshılarımız chempion bolıp kórmegen edi,-deydi komandanıń bas treneri Jamiyla Baymuratova.- Mine 2025-jılı komandamız ushın áwmetli baslandı hám tariyxta birinshi márte birinshi orındı iyelewge miyasar boldıq. Qızlarımızdıń bunday úlken tabıslardı qolǵa kirgiziwinde, maǵan járdemshi trener bolǵan Alima Jiyemuratovanıń da salmaqlı úlesi bar. Sonlıqtan barlıq komandamız aǵzalarına hám trenerlerimizge úlken raxmet aytaman.
Aldaǵı waqıtları komandamız aǵzaları arasınan xalıqaralıq dárejedegi sportshılar ósip jetilisetuǵınlıǵına bekkem isenemen.