Mámleketimiz basshısı bıyılǵı jıldıń 14-fevral kúni mámleketimiz jasları menen sóylesiw ótkerip, ushırasıwda jaslar menen islesiw nátiyjeliligin arttırıw, olarǵa jáne de keń imkaniyatlar jaratıw ilajların dodalaǵan edi.

Bul ushırasıwda jaslardıń qızıǵıwshılıqları hám mútájliklerin waqtında anıqlawda jasalma intellekt texnologiyalarınan paydalanıw, potencialın monetizaciyalaw, sociallıq áhmiyetke iye joybarlarǵa tartıw áhmiyetli ekenligi atap ótilgen.
Jaslar ushın, áne, usınday áhmiyetli joybarlardan biri “Technovation Girls Uzbekistan-2025” – Ózbekstandaǵı hayal-qızlar ushın iri STEM – baǵdarlamasınıń jańa máwsimine start berildi.
Ilajda 1500 ge shamalas hayal-qızlar qatnastı. “Technovation Girls” – qızlar ushın xalıqaralıq texnologiyalıq tańlaw bolıp, hár jılı dúnyanıń 70ten aslam mámleketinde ótkerip kelinedi. Tańlawdıń maqseti qatnasıwshı qızlarǵa beyimlesiwsheń kónlikpelerdi beriw, sociallıq mashqalalardı sheshiw ushın olardı IT – texnologiyalarına, programmalastırıw imkaniyatları hám jasalma intellektke hám texnologiyalıq tarawlardaǵı isbelermenlikke qızıqtırıwdan ibarat.
Ilajda Ózbekstan Respublikası sanlı texnologiyalar ministri Sherzod Shermatov qatnasıp, shıǵıp sóyledi. Ministr ózbek qızlarınıń joqarı potencialǵa iye ekenin atap ótti.
– Elimizde hayal-qızlardıń startapların qollap-quwatlawǵa oǵada úlken itibar qaratılmaqta. Bul ilajdıń bıyılǵı ashılıwı ózbek qızlarımızdıń joybar hám startapların jáne de qollap-quwatlaw ushın áhmiyetli basqısh bolıp xızmet etedi. Bıyıl jaqsıraq háreket etetuǵın bolsaq, finalǵa shıǵatuǵın qızlardıń sanı jáne de kóbirek boladı dep oylayman. Ózbek qızlar hesh kimnen kem emes ekenligine sırt el saparlarına barǵanımızda gúwa bolǵanbız. Qızlarımızda kreativlik kúshlirek hám oǵan basqa mámleketlerdiń wákilleri de háwes etedi. Aldıńızǵa jaqsı maqsetler qoyıp háreket etiwden toqtamawıńızdı tilep qalaman, – dedi ministr óziniń shıǵıp sóylegen sózinde.

N.Rahmanova,
ÓzA