Ózbekstannıń Yaponiyadaǵı elshixanasında mámleketimiz puqaralarınıń miynet migraciyası máselesine baǵıshlanǵan seminar hám dógerek sáwbeti ótkerildi.

Ilaj Yaponiya xalıqaralıq birge islesiw agentligi (JICA) hám usı mámlekettiń bir qatar jumıs beriwshi kárxanaları menen birgelikte shólkemlestirildi.
Elshi Muhsinxwja Abduraxmanov qatnasıwshılardı tarawdaǵı házirgi jaǵday, sırt elde jumısqa jaylasıw procesin jetilistiriwge baǵdarlanǵan reformalar menen tanıstırdı.
Ushırasıw waqtında JICA tárepinen jolǵa qoyılǵan «Yaponiyada bántlik imkaniyatınan paydalanǵan halda, Ózbekstannıń sanaat tarawı kadrlarınıń potencialın arttırıw» joybarı usınıs etildi.
Sonday-aq, puqaralarımızǵa jumıs izlewde járdem beretuǵın onlayn platforması kórsetildi.
Itibarlısı, kóplegen yapon kompaniyaları ózbekstanlı qánigelerge qızıǵıwshılıq bildirdi. Dodalaw sheńberinde tárepler miynet migrantların yapon tili boyınsha oqıtıw, olardıń mamanlıǵın arttırıw ushın ámeliy ilajlar islep shıǵıwǵa kelisip aldı.
Eki mámlekettiń miynet migraciyası tarawında birge islesiwdi keńeytiwge umtılısın kórsetken ilajda keleshektegi birge islew jumıs baǵdarları belgilep alındı.

Aziza Alimova, ÓzA