Paytaxtımızdaǵı Simpoziumlar sarayında Saudiya Arabstanı Patshalıǵı Haj hám umra isleri ministri Tavfiq bin Favzon ar-Rabia basshılıǵındaǵı delegaciya menen Ózbekstan Respublikası Din isleri boyınsha komitet baslıǵı Sodiq Toshboev, Ózbekstan musılmanları mákemesiniń baslıǵı, muftiy Shayx Nuriddin Xoliqnazar hám basqa da tiyisli juwapkerlerdiń qatnasıwında sóylesiw bolıp ótti.

Bekkem tariyxıy, mádeniy hám diniy baylanıslarǵa tiykarlanǵan Ózbekstan – Saudiya Arabstanı baylanıslarınıń joqarı dárejesi eki mámleket jetekshileri basshılıǵında alıp barılıp atırǵan óz-ara doslıq qatnasıqlarınıń nátiyjesi bolıp tabıladı.

Haj hám umra isleri ministri Tavfiq bin Favzon ar-Rabia shın júrekten qabıllaǵanı ushın minnetdarshılıq bildirip, bul sapar etiwden maqset Ózbekstan hám Saudiya Arabstanı Patshalıǵı arasındaǵı birge islesiw qatnasıqların bunnan bılay da jetilistiriw, ásirese, Haj hám umra ilajların shólkemlestiriwdiń sapasın arttırıw, diniy-aǵartıwshılıq, ilimiy-izertlew, turizm,  transport tarawlarındaǵı baylanıslardı bekkemlewge qaratılǵanın bildirdi.

Ministr Imam Buxariy, Imam Termiziy, Farabiy, Beruniy, Ibn Sina sıyaqlı ulamalardıń islam aǵartıwshılıǵına, dúnya civilizaciyasına qosqan biybaha úlesin atap ótip, áyyemgi mádeniyat hám biybaha estelikler jurtı bolǵan Ózbekstanǵa saudiyalılardıń da zıyaratqa úgit-násiyatlawda belsendi bolıwın aytıp ótti.

Sóylesiwde Haj hám umra ilajların ámelge asırıwdıń shólkemlestiriw-huqıqıy tiykarları támiyinlengeni, puqaralarımızǵa qolaylıqlar, jáne de jaqsı imkaniyatlar jaratıw boyınsha sistemalı jumıslar islenip kiyatırǵanı, atap aytqanda, umra ilajların úlgili shólkemlestiriw, zıyaratshılarǵa ámellerdi tolıq, qáwipsiz orınlawına múnásip sharayatlar jaratıw, olardıń kepillik berilgen xızmetlerden paydalanıwın támiyinlew maqsetinde respublikamız nızamshılıǵına muwapıq Ózbekstanda umra ilajın shólkemlestiriw wákilligi Ózbekstan musılmanları mákemesi jáne 12 shirketke berilgeni aytıp ótildi.

Haj hám umra isleri menen baylanıslı nızamsız háreketlerdiń aldın alıw boyınsha túsindiriw hám úgit-násiyatlaw jumısları alıp barılıp atırǵanı atap ótildi.

Ushırasıwda Ózbekstan musılmanları mákemesi baslıǵı, muftiy Shayx Nuriddin Xoliqnazar bárinen burın, bunday birge islesiwshilerge tiykar jaratıp berip atırǵanı ushın Ózbekstan Respublikası Prezidenti Shavkat Mirziyoev hám Eki Muqaddes Meshit xızmetkeri Saudiya Arabstanı Patshası Salmon bin Abdulaziz Ol Saud hám Miyrasxor shahzada Muhammad bin Salmonlarǵa minnetdarshılıq bildiriw menen birge jerleslerimiz ushın haj kvotası keyingi jıllarda 3 esege kóbeytilip, hár jılı 15 mıń jerlesimiz hajılıq baxtına miyasar bolıp, umra zıyaratshılarınıń sanı bir neshe júz mıńdı qurap, olarǵa bolǵan húrmet-itibar, sharayatlar barǵan sayın jaqsılanıp atırǵanın atap ótti.

Sonday-aq, sóylesiwde Prezidentimiz tárepinen ashıq-aydınlıq siyasatı alıp barılıp atırǵanı, ásirese, mámleketlerimiz húkimetleri hám ministrlikleri arasında energetika, bajıxana, puqaralıq aviaciya, turizm, awıl xojalıǵı, densawlıqtı saqlaw, miynet qatnasıqları sıyaqlı tarawlarda birge islesiwge baylanıslı kóplegen hújjetler qabıl etilgeni aytıldı.

Eki mámleket arasında ilimiy-izertlew jumıslarında keń kólemli birge islesiw, din ulamalarınıń qatnasıwında ánjumanlar ótkeriw, Saudiya Arabstanı puqaraları Ózbekstannıń Samarqand, Buxara, Termiz sıyaqlı áyyemgi qalalarına zıyaratqa keliwin shólkemlestiriw sıyaqlı jumıslardı rawajlandırıw baǵdarında pikir-usınslar bildirildi.

Tavfiq bin Favzon ar-Rabia Ózbekstan tárepinen bildirilgen usınıslardı hár tárepleme kórip shıǵıp, unamlı sheshiwde bar imkaniyatlardı iske qosatuǵının bildirdi.

Sóylesiw qızǵın hám kóterińki ruwhta ótti.

N.Usmanova,

ÓzAnıń xabarshası