Farmacevtika tarmaǵın rawajlandırıw agentliginiń direktorı Abdulla Azizov Kuveyt qalasında eki mámlekettiń júzden aslam iri kompaniya hám qarjı institutlarınıń qatnasıwında ótkerilgen Ózbekstan – Kuveyt biznes-forumına qatnasqanı hám bir qatar iri kompaniyalardıń basshıları menen birge islesiwdi rawajlandırıw, investiciyalıq joybarlardı ámelge asırıw boyınsha sóylesiwler ótkergeni haqqında xabar bergen edik.
Agentlik baspasóz xızmetiniń xabar beriwinshe, Abdulla Azizov «KSPI» (Kuwait Saudi Pharmaceutical Industries) hám «Gulf Care» kompaniyalarınıń wákilleri menen ushırastı.
«Tashkent Pharma Park» innovaciyalıq ilimiy-óndirislik farmacevtika klasteri aymaqlardaǵı jańa investiciyalıq joybarlar, elimizde farmacevtika tarawında ámelge asırılıp atırǵan imkaniyatlar hám jeńillikler haqqında hár tárepleme maǵlıwmat berildi.
KSPI (Kuwait Saudi Pharmaceutical Industries) 1980-jılı shólkemlestirilgen bolıp, Kuveyttiń birden-bir farmacevtika ónimlerin islep shıǵarıwshı kompaniyası bolıp tabıladı. 120 dan aslam farmacevtika ónimlerin tabıslı islep shıǵıw hám tarqatıw boyınsha úlken tájiriybege iye. Kompaniya jergilikli hám qońsılas mámleketlerdiń farmacevtika bazarın 85 procent ónim menen támiyinlep kelmekte. «Gulf Care» bolsa Persiya qoltıǵı mámleketlerinde medicinalıq ásbap-úskeneler, medicinalıq hám laboratoriyalıq xızmetlerdi jetkerip beriw boyınsha tiykarǵı kompaniya bolıp tabıladı.

Mohigul Qosimova,
ÓzAnıń xabarshısı