Házirgi waqıtta Oliy Majlis Nızamshılıq palatasınıń gezektegi májilisi bolıp ótpekte.

Májiliste dáslep Ózbekstan Respublikası Oliy Majlisi Nızamshılıq palatasınıń Jaslar máseleleri boyınsha komissiyasın dúziw haqqındaǵı másele kórip shıǵıldı.
Mámleketimizde jaslardı qollap-quwatlaw, olardıń imkaniyatın júzege shıǵarıw tarawında alıp barılıp atırǵan reformalarda Oliy Majlis Nızamshılıq palatasınıń qatnasın keńeytiw, zamanagóy dúnyaqaras, bilim hám kónlikpege iye jaslardıń bilimlerin hám demokratiyalıq kónlikpelerin rawajlandırıw maqsetinde Nızamshılıq palatasınıń Jaslar máseleleri boyınsha komissiyasın dúziw boyınsha qarar qabıl etildi.
Bunnan soń deputatlar «Mámleketlik sociallıq qamsızlandırıw haqqında»ǵı nızam joybarın ekinshi oqıwda statyama-statya dodaladı.
– Házirgi kúnde xızmetkerler waqtınsha miynet qábiletin joyıtqanında yamasa jumıstan bosatılǵanda sociallıq qollap-quwatlawda bir qatar mashqalalarǵa duslaspaqta, – dedi deputat Mohira Xwjaeva. – Sonıń ishinde, hámiledarlıq hám tuwıw sonıń menen birge waqtınsha miynetke uqıpsızlıq napaqaları jumıs beriwshiler ushın artıqsha qarjılay júkleme bolǵanı sebepli bul napaqalardı jeke menshik sektorda tólemew yamasa hámiledarlardı jumısqa almaw, olardı jumıstan bosatıw jaǵdayları baqlanbaqta.
Joqarıdaǵı jaǵdaylardıń aldın alıw maqsetinde joybarda mámleketlik sociallıq qamsızlandırıw sisteması hám mámleketlik sociallıq qamsızlandırıw tólemlerin tólew tarawındaǵı qatnasıqlardı tártipke salıw, kesellik sebepli waqtınsha miynetke uqıpsızlıq, hámiledarlıq hám tuwıw, jumıs yamasa dáramattı joq etiw menen baylanıslı jaǵdaylarda tólenetuǵın waqtınsha miynetke uqıpsızlıq napaqası, hámiledarlıq hám tuwıw napaqası hám jumıstan bosatılǵanlıq napaqası mámleketlik sociallıq qamsızlandırıw menen ámelge asırılıwı názerde tutılmaqta. Májbúriy qamsızlandırıwdan ótken puqaralardıń tólemleri kepillenedi.
Sonday-aq, mámleketlik sociallıq qamsızlandırıw boyınsha qamsızlandırıw hádiyseleri júz bergende tiyisli tólemlerdi tayınlaw hám tólew tártibi, mámleketlik sociallıq qamsızlandırıw boyınsha tólemlerdi toqtatıp turıw, qayta tiklew hám saplastırıw tiykarları belgilenbekte.
Dodalawlarda bir qatar sorawlar ortaǵa taslandı hám tiyisli juwaplar berildi. Májiliste nızam joybarı ekinshi oqıwda qabıl etilip, Senatqa jiberildi.

M.Komilova,
ÓzA