Ózbekstan Respublikası Prezidenti Shavkat Mirziyoev 18-fevral kúni Al-Kuveyt qalasına saparı sheńberinde usı mámlekettiń Miyrasxorı Shayx Saboh as-Saboh penen ushırasıw ótkerdi.
Ózbekstan menen Kuveyt arasında doslıq hám keń kólemli sheriklik qatnasıqların bunnan bılay da rawajlandırıw hám bekkemlew máseleleri kórip shıǵıldı.
Sóylesiw basında mámleketimiz basshısı Miyrasxorǵa shın júrekten qabıllaǵanı hám ayrıqsha itibar ushın minnetdarshılıq bildirdi.
Kúni keshe bolıp ótken joqarı dárejedegi tariyxıy sóylesiwler, húkimet aǵzaları hám jetekshi kompaniyalar menen paydalı ushırasıwlar kóp tárepleme Ózbekstan-Kuveyt qatnasıqların keńeytiwge bekkem tiykar bolatuǵını atap ótildi.
Joqarı dárejede jedel sóylesiw hám almasıwlardı dawam ettiriwge kelisip alındı. Investiciyalardı tartıwǵa platformanı tez arada iske qosıw, agrosanaat kompleksi, transport hám logistika, densawlıqtı saqlaw, bilimlendiriw, farmacevtika, infrastruktura hám basqa da baǵdarlarda kooperaciyalıq joybarlardı ámelge asırıwǵa kelisip alındı.
«Oraylıq Aziya – Arab qoltıǵı mámleketleri birge islesiw keńesi» sóylesiwi sheńberindegi baslamalardı óz-ara qollap-quwatlaw máselelerine ayrıqsha itibar qaratıldı.
Qabıl etilgen barlıq qarar hám kelisimlerdi orınlaw ústinen birgelikte qadaǵalaw ornatıw máselesi kelisip alındı.

ÓzA