Fotoreportaj

Ózbekstan Kórkem óner akademiyası Qaraqalpaqstan bólimi Kórgizbeler sarayında Amerikanıń «Apexart» qorı tárepinen Aral mashqalasına baǵıshlanǵan «Biz teńiz shópleri edik» atamasındaǵı kórgizbe shólkemlestirildi.
Kórgizbede Aralboyı mashqalasına itibar qaratqan Qaraqalpaqstan Respublikasınan Aleksandr Agay, germaniyalı Lena Pozdnyakova hám Еldar Tagi, Ullı Britaniya mámleketinen Liliya Bakanova hám watanlasımız Saodat Ismoilovanıń dóretiwshilik jumısları kórgizbege qoyılǵan. Bul shıǵarmalarda Aral teńiziniń tariyxı hám onıń házirgi kúndegi jaǵdayı dóretiwshilik kózqaraslarda sáwlelengen.
Qazaqstanlı xudojnik Aleksandr Ugay Moynaq rayonınıń aymaǵı tábiyatında payda bolǵan unamsız jaǵdaydı, shań-tozanlardıń kóteriliwin «Kamera-obskura» úskenesi járdeminde súwretlep bergen.
Germaniyalı Lena Pozdnyakova hám Еldar Tagi aymaqtaǵı jaǵdaydı, teńiz suwınıń sıbırlısın, samal esiwi hám ósimlikler terbelisin dawıslardı arnawlı materiallar járdeminde sáwlelendirgen.
Andliya dóretiwshisi Liliya Bakanova Aral teńizi hám onıń átirapındaǵı turmıstı jipten toqılǵan háykel járdeminde súwretlegen.
Negizi ózbekstanlı, házirgi waqıtta Franciyada jasap atırǵan dóretiwshi Saodat Ismoilova bolsa kórgizbe qatnasıwshılarına «Kórinbes teńizden balıq awı» dep atalǵan hújjetli filmin usınǵan. Bul filmde Aral teńiziniń boyında jasap atırǵan moynaqlı balıqshılardıń suw tamtarıslıǵı sebepli payda bolǵan awır turmıs sharayatı haqqında sóz etiledi.

M.HABIBULLAEV, (súwret),
Qaraqalpaqstan xabar agentligi