Májbúriy orınlaw byurosı Qaraqalpaqstan Respublikası Ámiwdárya rayonlıq bólimi xızmetkerleri tárepinen birge islesiwshi shólkemler menen birgelikte alıp barılǵan úgit-násiyatlaw jumıslarınıń nátiyjesinde jáne bir shańaraq jarastırıldı.
Puqaralıq isleri boyınsha Ámiwdárya rayonlıq sudınıń 2023-jıl 27-oktyabrdegi buyrıǵı tiykarında S.Snıń paydasına onıń tárbiyasındaǵı eki jas óspirim perzentiniń támiynatı ushın qarızdar K.Jnıń hár aydaǵı jámi dáramatınıń 1|3 bólegi muǵdarında aliment óndiriw belgilengen edi. Bul sud buyrıǵı tiykarında Májbúriy orınlaw byurosı Ámiwdárya rayonlıq bólimi mámleketlik atqarıwshısı tárepinen orınlaw háreketleri alıp barıldı. Atap aytqanda, aliment tólewshi hám alıwshı jasaytuǵın máhálle baslıǵı menen birgelikte ajırasqan shańaraqtı jarastırıw boyınsha úgit-násiyat jumısları alıp barılǵan.
Nátiyjede óndiriwshi hám qarızdar Byuronıń Ámiwdárya rayonlıq bólimine kelip, házirgi kúnde birge jasap atırǵanlıǵın bildirdi hám aliment óndiriw haqqındaǵı sud qararınıń orınlanıwın tamamlawdı sorap ótinish xatın berdi. Házirgi waqıtta, jas óspirim perzentler tolıq shańaraqlıq ortalıqta kamalǵa kelmekte.

Qaraqalpaqstan xabar agentligi