Bishkek qalasında Qırǵız Respublikası bilimlendiriw hám ilim ministri Doqdurkul Kendirboeva hám Ózbekstannıń usı mámlekettegi Ayrıqsha hám tolıq huqıqlı elshisi Saidikrom Niyozxwjaev arasında ushırasıw bolıp ótti. Bul haqqında «Kabar» málimleme agentligi málim etken.
Sóylesiw dawamında birge islesiwdi tereńlestiriwge baylanıslı máseleler dodalanıp, suw resursları, klimat ózgeriwi hám ekologiya tarawında ilimiy izertlew procesin jolǵa qoyıw temasına ayrıqsha itibar qaratıldı.
Qıtay – Qırǵızstan – Ózbekstan temir jolı sıyaqlı iri infrastruktura joybarları ushın maman kadrlar tayarlaw zárúr ekenligi, sonday-aq, ekologiya, awıl xojalıǵı hám fermerlik baǵdarlarında bilimlendiriw baǵdarlamaların islep shıǵıwǵa baylanıslı máseleler kóterildi.
Joqarı bilimlendiriw hám ilimiy dárejeler boyınsha diplomlardı óz-ara tán alıw haqqında shártnamaǵa qol qoyıw imkaniyatı da táreplerde qızıǵıwshılıq payda etti.
Sóylesiw waqtında usı tuwısqan úlkede mámleketimizdiń jetekshi joqarı oqıw orınlarınıń filialların ashıw, studentler ushın viza alıw hám jasaw ornı boyınsha dizimnen ótiwge járdemlesiw teması da dıqqat orayında boldı.

Muharrama Pirmatova, ÓzA