Qaraqalpaq mámleketlik akademiyalıq muzıkalı teatrında Nókis qalası hákimligi wákilleriniń oqıwshı-jaslar, olardıń ata-anaları hám ustazlar menen ushırasıwı bolıp ótti.

Ilajda mámleketimiz basshısınıń baslaması menen elimizde jaslardıń mádeniy dárejesin arttırıw, milliy hám ulıwma insanıylıq mádeniyatınıń eń jaqsı úlgilerinen qanaatlanıwın támiyinlew hám bos waqıtların mazmunlı hám nátiyjeli ótkeriwge ayrıqsha itibar qaratılıp atırǵanı haqqında sóz etildi.
Mámleketimiz basshısınıń 2024-jıl 22-noyabrdegi «Teatrlardıń jámiyettiń mádeniy turmısındaǵı áhmiyetin arttırıw hám olardıń jumısın jáne de qollap-quwatlap ilajları haqqında»ǵı qararı elimizde teatr ónerin jáne de rawajlandırıw, teatrlardıń jumısın jetilistiriw hám olardıń texnikalıq bazasın bekkemlew, spektakllerdiń kórkemlik dárejesin arttırıwdı qollap-quwatlawǵa xızmet etpekte. Qararda xalıq, ásirese, jaslardıń qatnasıwında «Máhálle jetiligi» aǵzaları menen birgelikte hár ayda máhállelerde «Teatr kúni» ilajların ótkeriw, onda dóretiwshilik ushırasıwlar hám teatrlastırılǵan kompoziciyalıq kórsetiwler yaki teatrlarǵa keliwin shólkemlestiriw, «Temir dápter», «Hayal-qızlar dápteri» hám «Jaslar dápteri»ne kirgizilgen puqaralar hám mayıplıǵı bolǵan shaxslar mámleketlik teatrlardıń spektakllerine biypul kiriwi belgilendi.
Nókis qalası hákimligi baslaması menen Berdaq atındaǵı Qaraqalpaq mámleketlik akademiyalıq muzıkalı teatrı hám Qaraqalpaq mámleketlik jas tamashagóyler teatrı menen birge islesiw memorandumına qol qoyıldı. Bunnan gózlengen maqset, jaslardı teatrlarǵa qamtıp alıw hám spektakller tamashasın shólkemlestiriw arqalı olardıń ruwxıy hám intellektuallıq jaqtan rawajlanıwın, ana Watanǵa bolǵan súyispenshiligin arttırıw, shańaraq, ata-ananıń qádirine jetiwdi támiyinlewden ibarat.
Ilajda qatnasqan Nókis qalasındaǵı barlıq ulıwma bilimlendiriw mektepleriniń 10-11-klasslar oqıwshıları, olardıń ata-anaları hám ustazlar itibarına S.Uzaqbaev hám P. Óteniyazov shıǵarması tiykarında saxnalastırılǵan «Perzent táshwishi» spektakli kórsetildi.
Jıl dawamında hápteniń shembi kúni oqıwshı-jaslardıń teatrlarǵa keliwi shólkemlestiriledi.

ÓzA