Nókis olimpiada hám paralimpiada sport túrlerine tayarlaw orayında «Bes baslama olimpiadası»nıń 2025-jılǵı máwsimine rásmiy start berildi.

Usı múnásibet penen shólkemlestirilgen ilajda Qaraqalpaqstan Respublikası Ministrler Keńesi Baslıǵınıń orınbasarı R.Zarikeev, Qaraqalpaqstan Respublikası Sport ministri A.Allanazarov, Nókis qalası hákimi A.Daniyarov, Jaslar isleri agentligi Qaraqalpaqstan Respublikası basqarması baslıǵı P. Maxsetbaev mámleketimiz basshısınıń baslaması menen elimizde jaslardı denetárbiya hám sportqa tartıw, olardıń sport tarawında qábiletin kórsetiwi ushın kerekli sharayatlar jaratıw, sportshılar hám olardıń trenerlerin xoshametlewge qaratılıp atırǵan itibarǵa ayrıqsha toqtap ótti.
Ózbekstan Respublikası Prezidenti, Milliy Olimpiada komiteti baslıǵı Shavkat Mirziyoevtiń basshılıǵında olimpiada hám paralimpiada háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajları boyınsha ótkerilgen videoselektor májilisinde atap ótilgenindey, hár bir insan, hár bir ata-ananıń arzıw- niyeti fizikalıq hám ruwxıy bárkamal áwladtı tárbiyalaw bolıp esaplanadı. Buǵan bolsa dentárbiya hám sportsız erisip bolmaydı.
Mámleketimizde denetárbiya hám sporttı ǵalaba en jaydırıw, sport penen shuǵıllanatuǵınlardıń sanın arttırıwda mámleketimiz basshısınıń 2022-jıl 11-apreldegi «Máhállelerde jaslardı ǵalabalıq sportqa tartıwdı jańa basqıshqa alıp shıǵıw ilajları haqqında»ǵı qararı oǵada áhmiyetli.
Bul qararda máhállelerde ǵalabalıq sport penen shuǵıllanıw ushın texnikalıq bazanı bekkemlew hám sport imaratların zamanagóy sport inventarları menen támiyinlew, sonday-aq, imkaniyatı sheklengen jaslar ushın tiyisli sport infrastrukturasın jaratıw, xalıq arasında salamat turmıs tárizin qáliplestiriw, oqıwshıları jeńimpaz hám sıylı orın iyeleri bolǵan ulıwma orta bilimlendiriw mektepleriniń denetárbiya páni oqıtıwshıları hám sport –bilimlendiriw mákemeleriniń trenerleriniń miynetin múnásip xoshametlew ǵalabalıq sporttı rawajlandırıwdıń tiykarǵı baǵdarları sıpatında belgilendi.
Jańa máwsimge rásmiy start beriw máresiminde Qaraqalpaqstan Respublikası oraylıq studiyasınan máhálle jasları, mayıplıǵı bolǵanlar, sport mektebiniń tárbiyalanıwshıları, ulıwma bilimlendiriw mektepleri hám professional bilimlendiriw mákemeleri oqıtıwshıları, ótken jılǵı jarıstıń jeńimpazları qatnastı. «Bes baslama olimpiadası»nıń ótken jılǵı nátiyjesine bola, Qaraqalpaqstan Respublikası 50 medal (16 altın, 15 gúmis, 19 bronza) menen jetekshilik etkenin atap ótiwimiz kerek.
Ilajda Ózbekstan Respublikası Sport ministrligi tárepinen Nókis qalası hám Qońırat rayonı hákimleri «Jismoniy tarbiya va sport alyochisi» kókirek belgisi menen sıylıqlandı. Sonday-aq, «Bes baslama olimpiadası» sheńberinde ótkeriletuǵın jarıslar ushın máhálle jasları jetekshilerine sport inventarları tapsırıldı.

ÓzA