Sociallıq tarmaqlarda kóp qabatlı turaq jaylarǵa xızmet kórsetetuǵın basqarıw uyımların májbúriy túrde basqa basqarıw uyımlarına biriktiriw jaǵdayları baqlanıp atırǵanı, onda múlk iyeleriniń pikiri inabatqa alınbay atırǵanı haqqında járiyalanǵan múrájat boyınsha Qurılıs hám turaq jay kommunallıq xojalıǵı ministrligi múnásibet bildirdi.
Ministrliktiń rásmiy múnásibetinde kóp qabatlı turaq jaylardı basqarıw haqqındaǵı nızamǵa, sonıń ishinde, basqarıw usılı múlk iyeleriniń ulıwma májilisi tárepinen hám xalıqtıń kelisimi tiykarında belgileniwi haqqındaǵı normalarǵa silteme keltirilgen.
Atap ótiliwinshe, xalıq tárepinen tán alınıp kiyatırǵan basqarıw uyımlarınıń jumısına tiykarsız aralasıw nızamshılıqta belgilengen tártipte juwapkershilikke sebep boladı.
Sonday-aq, hár bir taraw dáwir talabına sáykes túrde turaqlı jetilistirilip barılıwı kerek. Onda tarawdı jáne de qolaylastırıw, ondaǵı islemeytuǵın mexanizmlerdi qayta kórip shıǵıw, zamanagóy processler tiykarında sistemanı tártipke salıw úlken áhmiyetke iye.
Kóp kvartiralı turaq jaylarǵa xızmet kórsetiw tarawın jetilistiriw, onıń tiykarında xalıqqa jáne de qolaylı sharayat jaratıwdı támiyinlew maqsetinde alıp barılıp atırǵan jumıslar nátiyjesinde búgin tarawda salamat báseki ortalıǵı qáliplesti. Xalıqta da ózi jasaytuǵın kóp qabatlı jaylarǵa qolqatılmaslıq sezimi artıp, basqarıw uyımınan kerekli xızmetlerdi talap etiw, jumısın bahalaw procesinde belsene qatnasıw mádeniyatı qáliplespekte.
«Kóp kvartiralı jaylardı basqarıw haqqında»ǵı nızamǵa muwapıq kóp kvartiralı jaydı basqarıw usılı ondaǵı jaylar múlk iyeleriniń ulıwma májilisinde, xalıqtıń kelisimi tiykarında belgilenedi.
Sonlıqtan, Qurılıs hám turaqjay kommunallıq xojalıǵı ministrligi xalıq tárepinen tán alınıp kiyatırǵan basqarıw uyımlarınıń jumısına tiykarsız aralasıw nızamshılıqta belgilengen tártipte juwapkershilikke sebep bolatuǵının eskertedi.

Sh.Mamaturopova, ÓzA